Atyraý munaıshylary 3265 metr tereńdikten munaı gorızontyn tapty
Kásiporynnyń qoǵammen baılanys qyzmetiniń habarlaýynsha, resýrstyq bazany ulǵaıtý jumystary jalǵastyrylyp jatyr. Sonyń nátıjesinde S.Nurjanov ken ornynyń soltústik-batys bóliginde geologııalyq barlaý jumystaryn júrgizý barysynda tabysty nátıjelerge qol jetkizilgen.
«Baıyrǵy ken oryndaryn ıgeretin kompanııanyń basym mindetteriniń biri –resýrstyq bazany ulǵaıtý. Osy baǵyttaǵy júıeli jumystardyń nátıjesinde S.Nurjanov ken ornyndaǵy burǵylanbaǵan bóliginiń trıas shógindilerinde 3252-3265 metr tereńdikte jańa ónimdi gorızont anyqtaldy. NSV-11 baǵalaý uńǵymasyn burǵylaý qorytyndysymen 9 mm shtýtserde táýligine 165 tekshe metr debıtpen sýsyz munaı burqaǵy alyndy. Mundaǵy munaıdyń úles salmaǵy – 0,836 g/sm3, al, gaz faktory – 105 m3/m3. Qazirgi ýaqytta munda uńǵyma jumysynyń ońtaıly rejımin anyqtaý maqsatynda kásipshilik-geologııalyq jáne gıdrodınamıkalyq zertteýler keshenin júrgizý arqyly synaq jalǵasýda» - deıdi «Embimunaıgaz» AQ basqarma tóraǵasy Esen Qaıyrjan.
Byltyr QR Paıdaly qazbalar korlary jónindegi memlekettik komıssııasy qoldanystaǵy S.Nurjanov, Kenbaı (Shyǵys Moldabek ýchaskesi), Dosmuhambetov, Botahan jáne qaıta ashylǵan Batys Qarasor ken oryndarynda 14,8 mln. tonna kólemindegi qordy balansqa alyp, bekitken edi. Sonyń nátıjesinde «Embimunaıgaz» AQ ken oryndaryndaǵy munaıdyń alynatyn qory 86,2 mln. tonnany quraǵan.
