Atyraý munaı óńdeý zaýytynyń murjasynda taǵy da gaz alaýy jandy
«Atyraý MÓZ» JShS-niń qoǵammen baılanys bóliminiń málimetinshe, 8 mamyrda paraksılol óndiretin Paramax (PX) tehnologııalyq qondyrǵysyn iske qosý sharasy júrgizilgen. Alaıda, keshki saǵat 19:18-de aldyn ala fraktsııaǵa bólý baǵanyn ystyq tsırkýlıatsııaǵa shyǵarý kezinde qysym klapanynyń jumysynan aqaý shyqqan.
«Sol sebepten, tehnologııalyq kontýrda qysym joǵarylady. Apattardy joıý josparyna sáıkes jabdyqtyń germetıkalyq qasıetiniń buzylýyn boldyrmaý maqsatynda jaǵdaı turaqtalǵanǵa deıin gaz ýaqytsha fakelge jiberildi», -dep habarlady kásiporynnyń qoǵammen baılanys bóliminen.
Oblystyq ekologııa departamentiniń baspasóz qyzmetinen málim etkendeı, Atyraý qalasynda ornalasqan atmosferalyq aýa sapasynyń monıtorıngi stantsııalarynyń kórsetkishterine taldaý jumystaryn júrgizilip jatyr. Endi ekologtar «Atyraý MÓZ» JShS-ne qatysty jospardan tys tekseris júrgizýdi josparlap otyr.
Eske sala ketelik, budan buryn Atyraý munaı zaýytynyń murjasynda jarty saǵatqa jýyq ot alaýlaǵanyn habarlaǵan bolatynbyz.
«Atyraý MÓZ» JShS qoǵammen baılanys bóliminiń aqparatyna súıensek, 27 sáýirde jergilikti ýaqytpen saǵat 16:08-de katalıtıkalyq krekıng qondyrǵysynda tehnologııalyq rejım buzylǵan.
«Avarııalyq jaǵdaılarǵa jol bermeý maqsatynda janarmaı gazy májbúrli túrde fakelge jiberildi. Saǵat 16:33-te gazdy fakelge jiberý toqtatyldy. Qazir tehnologııalyq rejımniń buzylýynyń sebep-saldary anyqtalyp jatyr», - dep habarlaǵan edi zaýyttyń qoǵammen baılanys bóliminen.
Foto: Áleýmettik jeliden
