Atyraý munaı óńdeý zaýytynyń qyzmetkeri koronavırýs juqtyrǵan
ATYRAÝ. QazAqparat – Atyraý munaı óńdeý zaýytynyń qyzmetkeri koronavırýs ınfektsııasyn juqtyrǵan. Bul týraly «QazMunaıGaz» UK AQ málim etti, dep habarlaıdy QazAqparat.
«2020 jylǵy 2 sáýirde Atyraý qalasy boıynsha taýarlar men kórsetiletin qyzmetterdiń qaýipsizdik sapasyn baqylaý basqarmasy jasaǵan saraptama qorytyndysy boıynsha «Atyraý munaı óńdeý zaýyty» JShS qyzmetkeriniń koronavırýs ınfektsııasyn juqtyrǵany rastaldy. Bul qyzmetker 2020 jylǵy 28 naýryzda jumystan tys keshki ýaqytta basqa naýqas adammen baılanysta bolǵansoń ınfektsııany juqtyrý yqtımaldyǵy týraly habarlady. Bizdiń áriptesimiz qoldanystaǵy erejelerdi basshylyqqa ala otyryp, 2020 jylǵy 29 naýryzda ózi oqshaýlandy. 2020 jylǵy 1 sáýirde baılanysta bolǵan adam koronavırýstyq ınfektsııaǵa shaldyqqany rastalǵan soń AMÓZ qyzmetkerinen saraptama alyndy. Onyń nátıjesi búgin belgili boldy» delingen kompanııa taratqan aqparatta.
Atyraý munaı óńdeý zaýytynyń qyzmetkeri óz áriptesterimen baılanys jasamaǵan. Ol sońǵy ret jumys ornynda 28 naýryzda boldy.
Qazir Atyraý munaı óńdeý zaýytynyń basshylyǵy bekitilgen rásimderge sáıkes onymen baılanysta bolýy múmkin adamdardy tekserip jatyr. Memlekettik ýákiletti organdarmen ózara tyǵyz jumys jasaýda. Oblystyń sanıtarlyq-epıdemıologııalyq qyzmetimen birlesip, sanıtarlyq-epıdemıologııalyq sharalarǵa kiristi.
Al, Atyraý munaı óńdeý zaýyty qalypty rejımde jumys istep tur. Munaı ónimderin óndeý men jóneltý bekitilgen óndiristik josparǵa saı júzege asyrylyp jatyr.
