Atyraý munaı óńdeý zaýytynyń burynǵy bas dırektorynyń isi sotta qaralyp jatyr
Atyraýdaǵy №2 sotta munaı óńdeý zaýytynyń burynǵy bas dırektoryna QR Qylmystyq kodeksiniń 361-babynyń tórt epızodymen aıyp taǵylǵan.
Tergeý málimetteri boıynsha, burynǵy bas dırektordyń buıryǵymen komıssııa qurylǵan. Bul komıssııa munaıdy tereń óńdeý kesheniniń nysanyn aqaýly qurylǵysy jáne rpydalmaǵan jumys kólemi bola tura qabyldaý aktisin jasaqtaǵan. Bas dırektor qabyldaý aktisi negizge alyp, anyqtalǵan aqaýlarǵa qaramastan, keshen nysanyn paıdalanýǵa berý týraly buıryqqa qol qoıǵan.
Atyraý oblysy prokýrorynyń aǵa kómekshisi Nurbolat Ábilovtyń aıtýynsha, másele F-0101, F-0102, F-0103, F-0104 súzgileri jáne katalıtıkalyq krekıng qondyrǵysynyń F-0201 separatoryna qatysty týyndaǵan. «AMÓZ» JShS-nyń burynǵy bas dırektory sýspenzııanyń massalyq úlesin tómendetýge arnalǵan katalıtıkalyq krekıng qondyrǵysynyń ornatylǵan súzgileri men F-0201 sýspenzııa separatorynyń jumys istemeıtinin bilgen. Biraq, kemshilikterdi joıý úshin tıisti sharalar qabyldamaǵan.
Sharttyń talaptaryna sáıkes jabdyqty ornatýshy barlyq aqaýlardy, zaqymdardy jáne barlyq zalaldy óz esebinen joıýǵa mindet bolǵan. Biraq, jumys istemeıtin jáne aqaýy bar jabdyqtar úshin 728 607 855 teńge mólsherinde somany ustap qalý boıynsha sharalar qoldanylmaǵan.
Prokýratýra ókili aıyptalýshyǵa 4 jyl 6 aı bas bostandyǵynan aıyrýdy surady. Osy qylmystyq istiń taǵy bir aıyptalýshysy zaýyttyń memlekettik satyp alý departamentiniń basshysyn 3 jyl 6 aıǵa bas bostandyǵyan aıyrý usynyldy.
Sottyń kezekti sot otyrysy 17 mamyr ótedi.
