Atyraý munaı óńdeý zaýytynyń burynǵy bas dırektory aqtalyp shyqty
Atyraý qalasynyń №2 sotynda Atyraý munaı óńdeý zaýytynyń («AMÓZ» JShS) burynǵy bas dırektory D. jáne satyp alý departamentiniń dırektory S.-ǵa qatysty qylmystyq is qaraldy.
«Sottalýshylarǵa 2019-2020 jyldary AMÓZ-de «Munaıdy tereń óńdeý keshenin» salý kezinde JShS jarǵysynyń jáne reglamenttelgen sharttyń talaptaryn buza otyryp, merdigerden jetkizilgen aqaýly qurylǵynyń qunyn talap etý jóninde sharalar qoldanbaǵany nemese merdigerdiń kepildik mindettemeleri boıynsha osy qurylǵylardy aýystyrýdy talap etpegeni úshin aıyp taǵylǵan. Osylaısha, tergeý pikiri boıynsha memleketke 2,9 mlrd teńgeden astam zalal keltirilgen. Sot keshen qurylysyn salý kezinde jumys kóleminiń ulǵaıǵanyn anyqtady. Merdigerler qosymsha shyǵyndarǵa ushyraǵan. Bul memlekettik saraptamalardyń qorytyndylarymen rastaldy. Osyǵan baılanysty taraptar qosymsha sharttar jasasyp, oǵan sáıkes kepildik kórsetkishterge qol jetkizilmegen jáne anyqtalǵan aqaýlar úshin merdigerlerden somalar ustaldy. Budan basqa, «QazMunaıGaz» AQ jáne «AMÓZ» JShS keshendi salý kezinde olarǵa zalal keltirilmegeni týraly anyqtama berdi», - dep habarlady sottyń baspasóz qyzmeti.
Sot aıyptalýshylardyń áreketterinde taǵylǵan qylmystyq quqyq buzýshylyq quramynyń bolmaýyna baılanysty olardy barlyq epızodtar boıynsha kinásiz dep tanydy. Sondaı-aq, sottalýshylardyń qylmystyq is júrgizýshi organ áreketterinen keltirilgen zańsyz qylmystyq qýdalaý úshin zııandy óndirý quqyǵyn tanydy.
Azamattyq talap qaraýsyz qaldyryldy.
Sot úkimi zańdy kúshine engen joq.
Eske sala ketelik, budan buryn Atyraý munaı óńdeý zaýytynyń burynǵy bas dırektorynyń isi sotta qaralyp jatqanyn habarlaǵan bolatynbyz.
