Atyraý munaı óńdeý zaýytyndaǵy órt: Aımaqqa «Qazgıdromet» ókilderi attandy
ATYRAÝ. QazAqparat – Búgin kúndiz órt shyqqan Atyraý munaı óńdeý zaýytyna «Qazgıdromet» RMK-nyń ókilderi attandy, dep habarlaıdy QazAqparat QR Ekologııa, geologııa jáne tabıǵı resýrstar mınıstrliginiń málimetterine silteme jasap.
«2020 jylǵy 10 sáýirde Atyraý munaı óńdeý zaýytynda órt týraly buqaralyq aqparat quraldaryndaǵy habarlamaǵa baılanysty, «Qazgıdromet» RMK Atyraý oblysy boıynsha fılıalynyń qyzmetkerleri oqıǵa ornyna aýa sapasyna kezekten tys ólsheý jumystaryn júrgizý úshin shyqty.
«Qazgıdromet» RMK atmosferalyq aýaǵa baqylaý beketteri Atyraý qalasy aýmaǵynda ShRK-nyń (shekti ruqsat etilgen kontsentratsııa) asyp ketýi, ıaǵnı ólshengen zattar boıynsha (shań) 2 ShRK jáne ólshengen bólshekter boıynsha RM 10 - 1,78 ShRK tirkelgen»,-delingen habarlamada.
Sondaı-aq aqparatta Atyraý qalasy aýmaǵyndaǵy atmosferalyq aýanyń jaı-kúıin baqylaý 5 statsıonarlyq bekette júrgiziletindigi aıtylǵan.
Osyǵan deıin Atyraý munaı óńdeý zaýytynda qondyrǵylardyń biri janyp jatqandyǵy habarlandy.
Keıinirek atalǵan aımaqtaǵy órttiń sóndirilgeni habarlandy.
