Atyraý munaı óńdeý zaýytyndaǵy qondyrǵyny jóndeý 18 aqpanǵa deıin jalǵasady
Kásiporynnyń qoǵammen baılanys bóliminen málim etkendeı, 1 aqpanda Atyraý munaı óńdeý zaýytyndaǵy katalıtıkalyq krekıng qondyrǵysy jumysyn toqtatqan.
«Atyraý munaı óńdeý zaýyty 1 aqpanda regeneratorlarda temperatýranyń kóterilýine baılanysty katalıtıkalyq krekıng qondyrǵysynyń jumysyn toqtatty. Mamandar aqaýlardy anyqtaǵan soń «QazMunaıGaz» AQ» UK» basqarma tóraǵasy Maǵzum Myrzaǵalıevtiń tapsyrmasymen qondyrǵynyń jumysyn qalpyna keltirý boıynsha jedel shtab quryldy. «QazMunaıGaz» UK» AQ basqarma tóraǵasynyń munaı óńdeý jáne munaı hımııasy jónindegi orynbasary Arman Qaırdenov jetekshilik etetin jedel shtab katalıtıkalyq krekıng qondyrǵysyn jóndeý-qalpyna keltirý jumystarynyń qadaǵalap oty», -dep habarlady zaýyttyń qoǵammen baılanys bólimi.
Jóndeý-qalpyna keltirý jumystaryna arnaıy qurylǵan jedel shtabtan bólek katalıtıkalyq krekıng protsesiniń lıtsenzıary – Axens kompanııasynyń mamandary da tartylǵan. Lıtsenzıar júrgizgen tekserýdiń nátıjesine sáıkes jóndeý-qalpyna keltirý jumystary 18 aqpanda aıaqtalady. Al, qondyrǵyny iske qosý jumystary 18-22 aqpan aralyǵynda júrgiziledi. Katalıtıkalyq krekıng qondyrǵysy tolyq jumys rejımine 23 aqpanda qosylatyny josparlanǵan.
Eske sala ketelik, buǵan deıin qondyrǵy buzylýyna baılanysty Atyraý munaı óńdeý zaýyty basshysynyń birinshi orynbasary jumystan bosatylǵany habarlanǵan edi.
«QazMunaıGaz» AQ» UK» basqarma tóraǵasy Maǵzum Myrzaǵalıev 3 aqpan kúni Atyraý munaı óńdeý zaýytyna jumys saparymen baryp, kásiporyn basshylyǵymen keńes ótkizdi. Keńes barysynda «AMÓZ» JShS bas dırektorynyń birinshi orynbasary Rahymjan Janǵabylov qyzmetinen bosatyldy. Kásiporynnyń bas dırektory Murat Dosmuratovqa qatań sógis jarııalandy.
Foto: anpz.kz