Atyraý munaı óńdeý zaýytyndaǵy qondyrǵy jumysy qalpyna keltirildi

ATYRAÝ. QazAqparat – Atyraý munaı óńdeý zaýytynda katalıtıkalyq krekıng qondyrǵysy men oǵan qatysty tehnologııalyq nysandardyń jumysy tolyqtaı qalpyna keltirildi. Munaı ónimderin shyǵarý kólemin arttyrý protsesi qaıta jalǵasty, dep habarlaıdy QazAqparat.

Kásiporynnyń qoǵammen baılanys bóliminen málim etkendeı, keshe, 10 qańtarda buryn toltyrylǵan 36 vagon tsısternany qosa eseptegende barlyǵy 1 624 tonna suıyltylǵan kómirsýtek gazy jóneltilgen.

Onyń ishinde Aqtóbe oblysyna 176 tonna, Qyzylordaǵa – 584, Qostanaıǵa 490 tonna kómirsýtek gazy, Atyraý oblysyna 238 tonna, Batys Qazaqstanǵa – 127, Mańǵystaý oblysyna 40 tonna avtogaz bar.

«Atyraý munaı óńdeý zaýytynyń rezervýarlyq parkinde 38 200 tonadan astam áleýmettik mańyzy bar munaı ónimderi saqtalyp tur. Bul – 17 myń tonna AI-92, 1 200 tonna AI-95 janarmaıy, 20 myń tonnadan astam dızeldi otyn. Munaı ónimderin (avtobenzın men dızel otynyn) janarmaı beketter jelisine tıep jóneltý óndiristik josparǵa sáıkes turaqty túrde júrgizilip jatyr», -dep habarlady zaýyttyń qoǵammen baılanys bólimi.

Eske sala ketelik, budan buryn Atyraý munaı óńdeý zaýytynda qondyrǵy májbúrli túrde toqtatylǵanyn jazǵan edik.

Buǵan «Suıytylǵan munaı gazyn saqtaý parki» JShS qoımasynda gazdy saqtaıtyn bos oryn qalmaǵany sebep bolǵan. Sonyń saldarynan 10 qańtarda Atyraý munaı óńdeý zaýytynda katalıtıkalyq krekıng qondyrǵysynyń jáne oǵan qatysty tehnologııalyq nysandardyń jumysyn májbúrli túrde toqtatylǵan.

Osyǵan baılanysty «Atyraý MÓZ» JShS suıytylǵyn kómirsýtekti gaz óndirisin táýligine 500 tonnadan 20 tonnaǵa deıin, avtobenzınderdi táýligine 6000 tonnadan 1 500 tonnaǵa deıin, dızeldi otyndy táýligine 4 000 tonnadan 2 000 tonnaǵa deıin azaıtqan.