Atyraý munaı óńdeý zaýytyndaǵy aqaý anyqtaldy
ATYRAÝ. QazAqparat –Atyraý munaı óńdeý zaýytynyń bıologııalyq tazartý qurylǵylaryndaǵy aqaýdyń sebebi belgili boldy, dep habarlaıdy QazAqparat.
«AMÓZ» JShS ekologııa bóliminiń mamandarynyń málimetinshe, 1 qarashada saǵat 16.00-de elektr energııasyn berý jumystarynyń aqaýy sebebinen aǵyndy sýlardy bıologııalyq tazartý blogy tundyrǵyshynyń shlamyn retsırkýlıatsııalaý sorǵysy toqtatylǵan.
«Osyǵan baılanysty tundyrǵyshtyń qum súzgisine shyǵý núktesinde qalqyma jáne
organıkalyq zattar (bıoshlam) kontsentratsııasynyń artýy oryn aldy. Osy ýaqytta qum súzgi blogynda jóndeý jumystary júrgizildi. Bul blok tehnologııalyq sulbasynan ýaqytsha ajyratyldy. Osynyń saldarynan zaýyttyń bıologııalyq tazartý qurylǵylarynan ólshengen jáne organıkalyq zattary bar sarqyndy sý normatıvtik-tazartylǵan sarqyndy sýlar arnasyna aǵyzyldy», -dep habarlady onlaın-konferentsııada kásiporynnyń mamandary.
Bıologııalyq tazartý qurylǵylaryndaǵy aqaý 1 qarashada saǵat 23.00-de qalpyna keltirilgen. Sondaı-aq, normatıvti tazartylǵan aǵyndy sýlardyń arnasynda bıoshlamnyń býlaný óristerine odan ári enýine jol bermeıtin tosqaýyldar ornatylǵan.
Bıoshlam kanaldan vakýýmdyq mashınalarmen sorylyp, zaýytqa keri qaıtarylady.
Qazir AMÓZ-de elektr energııasyn jetkizý kezinde oryn alǵan aqaýdyń sebepteri men mán-jaıyn tekserý jónindegi komıssııa qurylǵan.
Eske sala ketelik, budan buryn Atyraý munaı óńdeý zaýytynyń bıologııalyq tazartý
qurylǵysynan aqaý shyqqanyn, kásiporynnyń zııandy qaldyqty tabıǵatqa tastaǵanyn
habarlaǵan bolatynbyz.
