Atyraý munaı óńdeý zaýytynda qondyrǵy májbúrli túrde toqtatyldy
Zaýyttyń qoǵammen baılanys bóliminen málim etkendeı, «Suıytylǵan munaı gazyn saqtaý parki» JShS qoımasynda suıytylǵan gaz saqtaıtyn bos oryn qalmaǵan.
«Aımaqtardaǵy gazjelilik mekemelerdiń suıytylǵan kómirsýtek gazyn der kezinde tasyp shyǵarmaýyna baılanysty bıylǵy 10 qańtarda AMÓZ katalıtıkalyq krekıng qondyrǵysynyń jáne oǵan qatysty tehnologııalyq nysandardyń jumysyn májbúrli túrde toqtatty. Birqatar tehnologııalyq qondyrǵylardyń toqtaýy nátıjesinde «Atyraý MÓZ» JShS kelesidegideı munaı ónimderin shyǵarý kólemin azaıtty. Máselen, suıytylǵyn kómirsýtekti gaz táýligine 500 tonnadan 20 tonnaǵa deıin, avtobenzınder táýligine 6000 tonnadan 1 500 tonnaǵa deıin, dızeldi otyn táýligine 4 000 tonnadan 2 000 tonnaǵa deıin. Joǵaryda aıtylǵandardyń negizinde bekitilgen óndiristik jospardan aýytqymaý maqsatynda «AMÓZ» JShS basshylyǵy Batys Qazaqstan, Aqtóbe, Qyzylorda jáne Qostanaı oblystarynyń ákimdikterin Energetıka mınıstrliginiń bólý josparyna sáıkes «Suıytylǵan munaı gazyn saqtaý parki» JShS-nen suıytylǵan kómirsýtek gazyn tasyp shyǵarý jumystaryn uıymdastyrýdy suraıdy», -dep habarlady zaýyttyń qoǵammen baılanys bólimin.
Energetıka mınıstrliginiń kestesine sáıkes Aqtóbe oblysyna 464 tonna, Qyzylordaǵa – 1 977 tonna, Qostanaıǵa – 3 683 tonna, Batys Qazaqstan oblysy úshin 3 589 tonna suıytylǵan gaz bólingen.
Eske sala ketelik, budan buryn Atyraý munaı óńdeý zaýytynda jóndeýden soń táýligine 400 tonnaǵa deıin gaz óndiriletinin habarlaǵan edik.
Foto: anpz.kz