Atyraý munaı óńdeý zaýytynda buzylǵan qondyrǵyny jóndeý aıaqtaldy
Bıylǵy 1 aqpanda Atyraý munaı óńdeý zaýytynda katalıtıkalyq krekıng qondyrǵysy jumysyn toqtatqan bolatyn. Osy oqıǵaǵa baılanysty «AMÓZ» JShS bas dırektorynyń birinshi orynbasary Rahymjan Janǵabylov qyzmetinen bosatyldy, kásiporynnyń bas dırektory Murat Dosmuratovqa qatań sógis jarııalandy.
Keıin jóndeý jumystary 18 aqpanǵa deıin jalǵasatyny, qondyrǵy 22 aqpanda iske qosylatyny habarlanǵan bolatyn.
Búgin zaýyttyń qoǵammen baılanys bóliminen málim etkendeı, bekitilgen merzimge sáıkes katalıtıkalyq krekıng qondyrǵysyn jóndeý aıaqtalyp, iske qosý jumystary júrgizildi. Qazir zaýyttyń tehnologııalyq jabdyqtary qalypty rejımde jumys istep tur.
«Bıylǵy 1 aqpanda Atyraý munaı óńdeý zaýytynda regeneratorlarda temperatýranyń kóterilýine baılanysty katalıtıkalyq krekıng qondyrǵysynyń jumysy apatty túrde toqtatylǵan bolatyn. Osyǵan baılanysty «QazMunaıGaz» AQ» UK basqarma tóraǵasynyń munaı óńdeý jáne munaı hımııasy jónindegi orynbasary Arman Qaırdenov jetekshilik etken jedel shtab quryldy. Jedel shtab katalıtıkalyq krekıng protsesiniń lıtsenzıary – frantsýzdyq Axens kompanııasynyń ókilderin, Pavlodar jáne Shymkent munaı óńdeý zaýyttarynyń mamandaryn tartyp, kásiporyn men merdiger mekeme mamandarynyń táýlik boıǵy jumys isteýin uıymdastyrdy. Qondyrǵyny jóndeý-qalpyna keltirý kezinde jedel shtab ózge eki munaı óńdeý zaýytynyń ońtaıly júktelýi men turaqty jumysyn baqylaýǵa aldy», - dep habarlady qoǵammen baılanys bóliminen.
Atyraý munaı óńdeý zaýytyndaǵy oqıǵanyń sebebine analız áli júrgizilip jatyr. Sondaı-aq zaýyt jumysyndaǵy táýekelderdi barynsha azaıtý, turaqty tehnologııalyq protsesti qamtamasyz etýge qatysty is-sharalar kesheni ázirlenýde.
Foto: m.azh.kz