Atyraý munaı óńdeý zaýytynda birneshe qondyrǵynyń jumysy 9 kúnge toqtaıdy
Kásiporynnyń baspasóz qyzmetinen málim etkendeı, 2022 jylǵy 3 qańtardan bastap zaýyttaǵy ELOÝ-AVT-3, CCR, KÝ GBD jáne Parisom qondyrǵylary josparly túrde 9 kúnge toqtatylady.
Bul qondyrǵylardyń jumysy josparly aldyn alý jumystary kestesine saı, bıylǵy jyldyń qyrkúıek aıynda toqtatylýy tıis edi.
Alaıda, Qazaqstan Respýblıkasynyń ishki naryǵyn strategııalyq munaı ónimderimen, atap aıtqanda, dızel jáne avtomobıl otynymen qamtamasyz etý qajettiligi nazarǵa alyndy.
Energetıka mınıstrligimen, «QazMunaıGaz» UK» AQ-men aldyn ala kelisilgen josparly-aldyn alý jumysyn 2021 jylǵy qyrkúıekten 2022 jylǵy qańtarǵa aýystyrý týraly sheshim qabyldandy.
«2022 jylǵy qańtarda «AMÓZ» JShS tórt tehnologııalyq qondyrǵysynda ónerkásiptik qaýipsizdik normalaryn saqtaý sheńberinde statıskalyq jabdyqty dıagnostıkalaý, ınspektsııalaý jáne dınamıkalyq jabdyqtyń jumysyn tekserý, sondaı-aq 3 tehnologııalyq qondyrǵydaǵy katalızatorlardy aýystyrý kózdelgen», -dep habarlady kásiporynnyń baspasóz qzymeti.
Osy kezeńde barlyq josparlanǵan is-sharany iske asyrý úshin «QazTýrboRemont» BK» JShS-niń Atyraý fılıaly, «NefteStroıServıs», «IQS Engineering», «Gold Sunray», «Intra», «RMÝ-Shymkent», «Tehnokontrol», «InjPromKompanı», «OrgNefteHım», «Buchen Industrial Service», «Catalyst Service», «AVC», «Euroslot», «Axens» jáne «UOP» seriktes kompanııalardy tartý josparlanyp otyr.
Al, 4 tehnologııalyq qondyrǵyda josparly-aldyn alý jumystary kezinde qalǵan óndirister bekitilgen óndiristik josparǵa sáıkes ónimdi shyǵarý, jóneltý shtattyq rejımde jumys isteýdi jalǵastyratyn bolady.
Eske sala ketelik, buǵan deıin Atyraýda 1 mlrd tekshe metr gazdy keshendi daıyndaý qondyrǵysy salynyp jatqanyn habarlaǵan bolatynbyz.
