Atyraý munaı óńdeý zaýytynda 400-den astam qyz-kelinshek jumys isteıdi
Elimizdiń munaı óńdeý salasyndaǵy baıyrǵy kásiporynnyń óndiristik býyndarynda joǵary sapaly ónim shyǵarýǵa erlermen birge qyz-kelinshekter de óz úlesin qosyp keledi. Qazir olardyń sany 400-den asty.
«Atyraý munaı óńdeý zaýytynda birneshe tseh, birneshe hımııalyq zerthana bar. Bularda jumys jasaıtyn mamandar býyny jyl saıyn aýysyp turady. Bizde jumysqa qabyldanǵan mamandardy er-azamat, áıel dep bólmeımiz. Eń bastysy –óziniń atqaratyn jumysyn jetik bilýi. Sol sebepten, bizge keletin jyl saıyn mamandardyń arasynda qyz-kelinshekter de kezdesedi. Qazir bizdiń zaýytta 400-den astam qyz-kelinshek jumys istep júr. Olar –hımımıalyq saraptama laboranttary, ınjenerler, operatorlar, ekonomıster, esepshiler, zańgerler. Biz zaýytta osyndaı jaýapty jumysty atqaryp júrgen qyz-kelinshekter eńbegin joǵary baǵalaımyz. Óıtkeni, olardyń bári de zaýytta óz mamandyǵynyń sheberleri, óndiristiń kórsetkishtiń jaqsarýyna, ujymdyq tabystyń molaıýyna úles qosyp keledi. Bári de otbasynda súıikti jar, bir qolymen besikti, ekinshi qolymen álemdi terbetken aıaýly ana. Áriptes qyz-kelinshekterdi kóktem merekesimen quttyqtap, bar jaqsylyqty tileımin» -dedi 8 naýryz halyqaralyq áıelder merekesine oraı ótken sharada Atyraý munaı óńdeý zaýytynyń bas dırektory Shýhrat Danbaı.
Kásiporyn basshysy merekege oraı otandyq munaı-gaz ónerkásibiniń damýyna laıyqty úlesin qosyp júrgen 40-tan astam qyz-kelinshekti «QazMunaıGaz» UK» AQ men «Atyraý munaı óńdeý zaýyty» JShS-niń alǵys hatymen marapattady.
