Atyraý munaı óńdeý zaýytynda 26 myń tonna benzın qory bar - zaýyttyń bas dırektory
Zaýyt basshysynyń aıtýynsha, qazir janar-jaǵar maı túrlerin tutynýshyǵa jetkizý úshin bir apta qajet.
«Qazir bizdiń zaýyttyń qorynda 26 myń tonna benzın, 22 myń tonna dızel otyny, 4 myń tonna kerosın bar. Benzın men dızel otynyn tutynýshylarǵa jetkizý úshin 5-6 kúnde, kerosındi bir aptada jetkiziledi», -dep málim etti Atyraý munaı óńdeý zaýytynyń bas dırektory Murat Dosmuratov.
Onyń deregine qaraǵanda, endi zaýyttyń qondyrǵylaryn synaqtan ótkizýdi jáne iske qosýdy bastaý úshin elektr qýatyn berýdi qalpyna keltirý qajet. Alaıda, KEGOC AQ elektr jelilerin qalpyna keltirý merzimin áli aıta qoıǵan joq.
«Bul – qysqa merzim ishinde ekinshi apattyq óshirý. Biz ótken jumada elektr energııasyna baılanysty eki qondyrǵynyń jumysyn toqtattyq. Sol qondyrǵylardy iske qosýǵa bir jarym kún ketti. Qazirgi ahýal basqasha bolyp otyr. Endi qondyrǵylardy munaı ónimderinen, katalızatordan tazartý qajet. Sondyqtan barlyq qondyrǵynyń jumysyn qalpyna keltirýge qansha kún ketetinin aıtý múmkin emes», -deıdi Murat Dosmuratov.
Eske sala ketelik, budan buryn Atyraý munaı óńdeý zaýytynda elektr qýaty sónip, qondyrǵylar toqtatylǵanyn jazǵan bolatynbyz.
Zaýyttyń qoǵammen baılanys bóliminiń málimetinshe, «KEGOC» AQ elektr qýatyn jospardan tys toqtatyp tastaǵan. Sonyń saldarynan Atyraý munaı óńdeý zaýytynda elektr qýaty bolmady. Osyǵan baılanysty zaýyt jumysy avarııalyq jaǵdaıda toqtatyldy.
Keıin Atyraý ekologtary munaı óńdeý zaýyty mańynda aýadan synama alyp jatqanyn habarlaǵan edik.
Oblystyq ekologııa departamentiniń mamandary Atyraý munaı óńdeý zaýytynyń sanıtarlyq-qorǵanysh aımaǵynyń shekarasynda atmosferalyq aýadan synamalar alýǵa kirisken.
«Jedel áreket etý maqsatynda departamenttiń zerthanalyq-taldamalyq baqylaý bóliminiń mamandary Atyraý munaı óńdeý zaýytynyń sanıtarlyq-qorǵanysh aımaǵynyń shekarasynda atmosferalyq aýanyń synamalaryn alyp jatyr. Synamalardy taldaý qorytyndysy keıin habarlanady», - dep málim etti departamenttiń baspasóz qyzmetinen.