Atyraý munaı óńdeý zaýytyna qatysty sotqa deıingi tergeý bastaldy
Básekelestikti qorǵaý jáne damytý agenttigi baspasóz qyzmetiniń málimetinshe, óńirlik departament mamandary Atyraý oblystyq prokýratýrasynyń basshylyǵymen birge «Atyraý munaı óńdeý zaýyty» JShS qyzmetine tekserý júrgizgen.
«Tekserý kezinde 2020-2021 jyldary shıki munaıdy qaıta óńdeý boıynsha jumystardy oryndaýǵa monopolııalyq joǵary baǵa belgileý túrinde AMÓZ ústem jaǵdaıyn teris paıdalaný deregin anyqtady. Osyǵan baılanysty tekserý qorytyndysy is júrgizý sheshimin qabyldaý úshin Atyraý oblystyq prokýratýraǵa jiberildi. Óńirlik prokýratýra QR Qylmystyq Kodeksiniń 221-babymen (Monopolıstik qyzmet) «AMÓZ» JShS qatysty sotqa deıingi tergeýdi bastap, 2020-2021 jyldary shıki munaıdy qaıta óńdeý boıynsha qyzmetterge monopolııalyq joǵary baǵany belgileý deregimen Atyraý oblysy boıynsha Ekonomıkalyq tergeý departamentine joldandy», -dep habarlady óńirlik vedomstvodan.
Eske sala ketelik, buǵan deıin Atyraý munaı óńdeý zaýytynda zııandy zattar shyǵaryndylarynyń 277 kózi baryn habarlaǵan bolatynbyz.
