Atyraý munaı óńdeý zaýytyna bir jylda 100 mln teńgeniń aıyppuly salynǵan
Oblystyq ekologııa departamenti baspasóz qyzmetiniń málimetinshe, byltyrǵy 9 aıda Atyraý munaı óńdeý zaýytyna 4 ret jospardan tys tekserý, 1 profılaktıkalyq baqylaý júrgizilgen.
«Birinshi jospardan tys tekserý kezinde bıologııalyq tazartý qondyrǵysynan quramynda úlken kontsentratsııada bıoshlamy bar sarqyndy óndiristik sýlardyń býlaný alańyna aǵyzǵany anyqtaldy. Atalǵan derekke baılanysty 31 mln 233 myń teńge aıyppul salyndy. Al, sáýir aıyndaǵy úshinshi jospardan tys tekserý kezinde kásiporyn tarapynan qorshaǵan ortaǵa emıssııalardyń normatıvterin asyrýǵa qatysty 4 zań buzýshylyq anyqtalyp, salynǵan aıyppuldyń kólemi 55 mln 949 teńge boldy. Maýsym-shilde aılarynda júrgizilgen profılaktıkalyq baqylaý kezinde anyqtalǵan zań buzýshylyqtardy joıý jóninde nusqama berilip, 6 mln 993 myń teńge kóleminde aıyppul salýǵa sheshim qabyldandy», - dep habarlady departamenttiń baspasóz qyzmeti.
Ótken jyly Atyraý munaı óńdeý zaýytyna ekologııalyq zańdylyqtyń talaptaryn buzǵany úshin 100 mln 672 myń teńge ákimshilik aıyppul salynǵan.
Eske sala ketelik, buǵan deıin budan buryn Atyraý oblysynda qorshaǵan ortany búldirgenderge 306 mln teńge aıyppul salynǵanyn habarlaǵan bolatynbyz.