Atyraý munaı óńdeý zaýyty jaýapqa tartylýy múmkin
ATYRAÝ. QazAqparat – Atyraý munaı óńdeý zaýyty ákimishilik jaýapkershilikke tartylýy múmkin, dep habarlaıdy QazAqparat.
Atyraý oblysy boıynsha ekologııa departamenti basshysynyń orynbasary – memlekettik bas ekologııa ınspektory Syrym Tilegenovtiń málimetinshe, bıylǵy 1 qarashada Atyraý munaı óńdeý zaýytynyń sarqyndy sýlar kanalyna bıologııalyq shlamdar men munaı ónimderin aǵyzyp jibergeni anyqtalǵan. Departament mamandary qoǵam belsendilerimen birge Atyraý qalasynyń ekologııalyq ahýalyna monıtorıng júrgizip, zaýyt tarapynan sarqyndy sý quramynda munaı ónimderi men bıologııalyq shlamnyń aǵyp jatqanyn tirkegen.
«Departamenttiń zerthanalyq-taldamaly baqylaý bólimi mamandary aǵyp jatqan sarqyndy sýdan synama aldy. Munaı óńdeý zaýytyna jospardan tys tekseris júrgizildi. Synamaǵa alynǵan sý quramynda jobalyq qujattamada belgilengen emıssııanyń normadan asý faktileri anyqtaldy. Atap aıtqanda, temir jáne qurǵaq qaldyqtar 1,5 ese, sýlfat 2,5 ese, azot amonıı 5 ese, munaı ónimderi 6 ese jáne ólsheýli zattar 628 ese asý deregi anyqtaldy. Atalǵan jaıttyń oryn alýy sarqyndy sýdy bıologııalyq tazalaý qondyrǵysyndaǵy aýytqýmen baılanysty bolyp otyr. «AMÓZ» JShS QR Ákimshilik quqyqbuzýshylyq týraly Kodeksiniń 325, 328 jáne 331-babyn buzdy», - dedi Syrym Tilegenov.
Onyń aıtýynsha, QR Ekologııalyq Kodeksiniń 130-baby, 2-tarmaǵynyń 6-tarmaqshasyna sáıkes, tabıǵat paıdalanýshy ekologııalyq zańnamany buzý faktileri týraly qorshaǵan ortany qorǵaý jónindegi ýákiletti organǵa úsh jumys kúni ishinde habarlaýǵa mindetti. Biraq, departamentke habarlama túspeýine baılanysty, «AMÓZ» JShS-ne QR Ákimshilik quqyq buzýshylyq týraly Kodekstiń 325-babyna sáıkes ákimshilik is qozǵalǵan.
«QR Ekologııalyq Kodeksiniń 118-babyna sáıkes, memlekettik ekologııalyq baqylaýdy júzege asyratyn laýazymdy tulǵalar ekologııalyq zańnama talaptary buzylǵan kezde qylmystyq jaza qoldanylatyn áreket belgileri bar faktiler boıynsha quqyq qorǵaý organdaryna habarlaýǵa mindetti. Osyǵan oraı, tekseris materıaldary jınaqtalyp, polıtsııa departamentine joldandy. Sol sebepten, QR Ákimshilik quqyqbuzýshylyq týraly Kodeksiniń 328, 331-baptarymen qarastyrylǵan ákimshilik ister qozǵalǵan joq. Polıtsııa departamentinen «AMÓZ» JShS-niń is-áreketinde qylmystyq jaza belgileri joq dep, materıaldar qaıtarylǵan jaǵdaıda «AMÓZ» JShS ákimshilik jazaǵa tartylatyn bolady», - dedi departament basshysynyń orynbasary – memlekettik bas ekologııa ınspektory Syrym Tilegenov.
Eske sala ketelik, budan buryn Atyraý munaı óńdeý zaýytynyń bıologııalyq tazartý qondyrǵysynan aqaý shyǵyp, zııandy qaldyqty tabıǵatqa tastaǵanyn habarlap edik.
