Atyraý munaı óńdeý zaýyty jańa aǵyn sýlardy tazartý qurylǵysyn salady
ATYRAÝ. QazAqparat - Atyraý munaı óńdeý zaýyty jańa aǵyn sýlardy tazartý qurylǵysyn salady, dep habarlaıdy QazAqparat.
«Biz jańa tazartý qurylǵysyn salamyz, sol sebepti osy jyly jańa TAZALYQ jobasyn júzege asyrmaqshymyz. Tazalaýdyń qazirgi júıesi eskirip, tehnıkalyq turǵyda tozǵandyǵyn moıyndaý kerek. Biz álemdik munaı óńdeý zaýyttarynyń tájirıbesin zerttedik, jáne de dereý jańa zamanaýı keshenniń jobasyn jasaqtaýǵa kirisemiz. Áreket etetin kez keldi», - dedi «AMÓZ» JShS Bas dırektory Shýhrat Danbaı.
AMÓZ-diń baspasóz qyzmeti habarlaǵandaı, tazartý nysandaryn jańartý 4 kezeńde júrgiziledi: 1 mehanıkalyq tazalaý jelisiniń qurylysy, bıologııalyq aǵyndy sýlardy tazartýdy qaıta qurý, sońǵy tazalaý qondyrǵysynyń qurylysy jáne 2 mehanıkalyq tazalaý jelisiniń qurylysy. TAZALYQ jobasyn engizý Jaıyq ózeninen sý alýdy kóp satyly tazartý júıesin paıdalaný arqyly azaıtady, sondaı-aq aǵyndy sýlardan lastaýshy zattardyń 99,9 % joıylady. Eń bastysy - kásiporynnyń qorshaǵan ortaǵa tıgizetin keri áseri aıtarlyqtaı tómendeıdi.
Qaıta jańǵyrtýdy 2023 jyldyń sońynda aıaqtaý josparlanýda.
