Atyraý munaı óńdeý zaýyty mańyndaǵy aýa men aǵyndy sýdyń sapasy tekserildi
Monıtorıng tobynyń músheleri 7 sáýirde aýanyń jáne tazartylǵan aǵyndy sýlardyń sapasyn tekserý maqsatynda Atyraý munaı óńdeý zaýytyna keldi.
Top quramynda oblystyq máslıhat depýtaty Arman Haırýllın, «Globýs» ekologııalyq-quqyqtyq bastamalar ortalyǵynyń basshysy Galına Chernova, Atyraý oblysynyń arnaıy mamandandyrylǵan tabıǵat qorǵaý prokýrory Erkebulan Ermekov, respýblıkalyq atmosferalyq aýany qorǵaý ǵylymı zertteý ortalyǵynyń ókilderi E.Dúsipov pen J.Dúısenbaeva, «Qazgıdromet» RMK ókilderi J.Janǵalıeva men A.Bısenbaeva, sondaı-aq ekologııa departamenti basshysynyń orynbasary S.Tilegenov bar.
«Jaǵymsyz ıistiń oshaǵy sanalatyn avarııalyq ashyq qamba mańynan kúkirtti sýtegi, azot dıoksıdi jáne kúkirt dıoksıdiniń quramy boıynsha atmosferalyq aýa synamasy alyndy. Oblystyq máslıhat depýtaty Arman Haırýllınniń jeke gaz saraptaǵyshy, sondaı-aq «Qazgıdromet» RMK jáne AMÓZ-diń sanıtarlyq óndiristik laboratorııasynyń aspaptary aýadaǵy kúkirtti sýteginiń quramy bir tekshe metrge 0,00 mg ekenin anyqtady. Aýa quramynan azot dıoksıdi de tabylǵan joq. Kúkirt dıoksıdi tekshe metrge 0,70 mg mólsherinde tirkeldi. Bul kórsetkish jumys aımaǵynda shekti ruqsat etilgen kontsentratsııadan birneshe ese az», -dep habarlady zaýyttyń qoǵammen baılanys bólimi.
Sondaı-aq, gaz saraptaǵysh aspaptar bıologııalyq-tazartý qondyrǵylarynyń mańynda aýa quramynda 0,2 mg kúkirtti sýtegi baryn, ıaǵnı 10 mg quraıtyn jumys aımaǵynda shekti ruqsat etilgen kontsentratsııadan birneshe ese az ekenin kórsetken.
Bıologııalyq tazartýdan keıingi aǵyndy sýlardan alynǵan synama kórsetkishteri shekti normany aspaǵan.
Eske sala ketelik, budan buryn Atyraýda aýadaǵy kúkirtti sýtegi shekti normadan 20 ese artqanyn jazǵan edik.
