Atyraý munaı óńdeý zaýyty lastaýshy zattardy aýaǵa normadan kóp shyǵarǵan
ATYRAÝ. QazAqparat – Atyraý munaı óńdeý zaýyty (AMÓZ) aýaǵa kómirqyshqyl gazy men azotty shekten tys shyǵarǵan. Bul týraly oblystyq ekologııa departamenti basshysynyń orynbasary Syrym Tilegenov málim etti, dep habarlaıdy QazAqparat.
Onyń aıtýynsha, departament mamandary Atyraý munaı óńdeý zaýytyna jospardan tys tekseris júrgizgen. Bıylǵy 27 sáýir – 26 mamyr aralyǵynda júrgizilgen tekserý kezinde «AMÓZ» JShS-niń statsıonarlyq kózderinen, ónerkásiptik shyǵaryndylardan, sondaı-aq hımııalyq taldaý maqsatynda «Týhlaıa balka» býlaný alańyna aǵyzylatyn sarqyndy sýdan synama alynǵan.
«Tekserý nátıjesimen «AMÓZ» JShS-niń Jylý elektr ortalyǵynda ornalasqan №3 qazannan kómirqyshqyl gazy, al №4 qazannan azot oksıdi men azot dıoksıdiniń shekti ruqsat berilgen normadan asý faktisi anyqtaldy.
Zaýyt aýmaǵynda ornalasqan gaz taratý shkaftarynyń shyraǵynan tabıǵı gazdyń shyqqany belgili boldy. Qazir «AMÓZ» JShS-ǵa qatysty joǵaryda kórsetilgen derekterge baılanysty QR Ákimshilik quqyqbuzýshylyq týraly kodeksiniń 328-babymen ákimshilik is qozǵaldy», - deıdi Syrym Tilegenov.
Sondaı-aq zaýyttyń sanıtarııalyq-qorǵanysh aımaǵynyń shyǵys bóliginde atmosferalyq aýanyń synamalary alynǵan. Taldaý nátıjesinde kómirsýtektiń shekti kontsentratsııasynan asqany anyqtalǵan. Osylaısha, qalalyq jáne aýyldyq eldi mekenderdegi atmosferalyq aýanyń gıgıenalyq normatıvteriniń talaby buzylǵan. Osyǵan baılanysty oblystyq Sanıtarııalyq-epıdemıologııalyq baqylaý departamentine «AMÓZ» JShS-ǵa qatysty zańda kózdelgen sharalardy qabyldaý úshin hat joldanǵan.
Eske salaıyq, budan buryn Atyraý munaı óńdeý zaýytyna qatysty sotqa deıingi tergeý bastalǵanyn, keıin atalǵan zaýytta qondyrǵy jumysy eki kúnge toqtaıtynyn habarlaǵan bolatynbyz.
