Atyraý munaı-gaz ınstıtýtyna Sáfı Ótebaevtyń atyn berý oryndy - senator L.Qıynov
ASTANA. QazAqparat - Atyraý munaı-gaz ınstıtýtyna Sáfı Ótebaevtyń atyn berý oryndy. Búgin Parlament Senatynyń jalpy otyrysynda Úkimet basshysynyń atyna saýal joldaǵan senator Lıazzat Qıynov osy máseleni kóterdi.
«Elbasy N. Nazarbaev Jalpyǵa Ortaq Eńbek Qoǵamyn qurý mindetin alǵa qoıyp otyrǵan búgingi tańda eńbek adamynyń qadir-qasıetin arttyrý, olardyń arasynda júzden-júırek, myńnan tulpar shyqqandardy ardaqtaý ári mańyzdy, ári qajetti», -degen depýtat el tarıhynda zor qurmetke laıyq tulǵalardyń biri Safı Ótebaev ekenin alǵa tartty.
1931 jyly Baký munaı ınstıtýtyna túsip, ony úzdik bitirgen, Qazaqstannan shyqqan tuńǵysh kásibı munaıshy atanǵan Sáfı Ótebaev elimizdiń ónerkásibinde óshpes iz qaldyrǵan. Jas kúninde Embi, Dossor, Maqat ken oryndaryn ıgergen, Mańǵystaýdyń munaıyn óndirýdi alǵash bastaǵan S. Ótebaev Qazaqstanda túrli laýazymda qyzmet atqaryp, el ekonomıkasynyń órkendeýine, ásirese munaı baılyǵyn ıgerýge eresen eńbek sińirgen tulǵa.
S. Ótebaevtyń tikeleı qol astynda jumys istegen, tárbıesin kórgender arasynda Bólekbaı Saǵynǵalıev, Rahmet Ótesinov, Salamat Muqashev, Maqash Balǵymbaev sekildi elimizge belgili tulǵalar kóp boldy.
«El aldyndaǵy eńbegi joǵary baǵalanyp, S. Ótebaev «Qurmet belgisi» ordenimen, Otan ordenimen, Birinshi dárejeli Barys ordenimen, Lenın ordenimen, Eki márte Eńbek Qyzyl Tý ordenimen marapattalǵan. Kózi tirisinde-aq «qazaq munaıynyń atasy» atanǵan ardaqty tulǵanyń, eńbekqorlyq, jaýaptylyq pen kisiliktiń, kishilik pen tazalyqtyń úlgisine aınalǵan adamnyń esimin el esinde máńgi qaldyrǵanymyz jón. Osyǵan oraı, Atyraý munaı-gaz ınstıtýyna ulttyq ónerkásip kadrlaryn daıyndaý isine ólsheýsiz úles qosqan S. Ótebaevtyń esimin berý qaı jaǵynan qarasaq ta oryndy», - dedi Lıazzat Qıynov.
Toqtala ketetin jaıt, qazaq munaıynyń atasy Sáfı Ótebaev týraly estelikter de joq emes. Máselen, halyq jazýshysy Ábish Kekilbaev osynaý asyl azamat týraly bylaı dep jazady: «Qııan túkpir Mańǵystaýda qalǵan balǵyn bala kezimde esimi eń kóp estigen adamym edi. Ol maǵan ushqysh Chkalovtaı, polıarshy Popanındeı, kombat Baýyrjan Momyshulyndaı, geolog Qanysh Sátbaevtaı, arman arıhıpelagynyń aqıyq turǵynyndaı bolyp elesteıtin. Óıtkeni, ol qazaq jerinen taıaýda ǵana tabylyp, nápaqasy qazaq aýzyna endi-endi tıe bastaǵan eń jańa yrzyq - ulttyń munaı ónerkásibiniń izashary, kóshbastary edi».
