Atyraý men Mańǵystaý – eldegi aılyq eń joǵary óńirler

ASTANA. QazAqparat – Atyraý oblysynda ortasha aılyq kólemi respýblıkalyq kórsetkishten 81,5% artyq. Strategııalyq josparlaý jáne reformalar agenttiginiń tóraǵasy Áset Erǵalıev Májilis depýtattarynyń saýalyna joldaǵan jaýabynda osyndaı derek keltirgen, dep habarlaıdy QazAqparat tilshisi.

«Kásiporyndardyń 2023 jylǵy 1 toqsandaǵy esepteriniń qorytyndysy boıynsha QR boıynsha ortasha aılyq jalaqy 340 636 teńgeni qurady. Óńirler bólinisinde eń joǵary aqy tólenetin Atyraý oblysy bolyp tabylady. Onda 2023 jyldyń 1 toqsanynyń qorytyndysy boıynsha qyzmetkerler 618 420 teńge, Qazaqstan boıynsha ortasha kórsetkishten 81,5%-ǵa artyq aldy. Odan keıin ortasha jalaqy respýblıkalyq deńgeıden 1,5 ese joǵary Mańǵystaý oblysy (509 818 teńge) keledi. Bul atalmysh óńirlerde ortasha aılyq ken óndirý ónerkásibi esebinen qalyptastyrylatynyna baılanysty. 2023 jyldyń 1 toqsanynyń qorytyndysy boıynsha taý-ken ónerkásibi qyzmetkerleriniń eńbegine aqy tóleý ortasha 766 555 teńgeni qurady. Bul respýblıkalyq deńgeıden 2,2 ese artyq», - dep jazylǵan jaýapta.

Agenttik málimeti boıynsha, ortasha aılyq jalaqy respýblıkalyq deńgeıden áldeqaıda tómen óńirler de bar.

«Mysaly, Soltústik Qazaqstan oblysynda 2023 jyldyń birinshi toqsanynyń qorytyndysy boıynsha jalaqy ortasha respýblıkalyq deńgeıden 29,2%, Jetisý oblysynda 27,7% tómen boldy. Salalar bólinisinde ortasha respýblıkalyq deńgeımen salystyrǵanda tómen aqy tólenetin salanyń biri – aýyl, orman jáne balyq sharýashylyǵy, sýmen jabdyqtaý, qaldyqtardy jınaý, óńdeý jáne joıý, lastanýdy joıý qyzmeti, óner, oıyn-saýyq jáne demalys. Osylaısha, óńirlik jáne salalyq aıyrmashylyqty esepke ala otyryp, 2023 jyldyń birinshi toqsanynda Qazaqstan Respýblıkasy boıynsha ortasha aılyq jalaqy 340 636 teńgeni qurady», - dep jazady Áset Erǵalıev.