Atyraý mektepterinde 300-den astam muǵalim jetispeıdi
ATYRAÝ. QazAqparat - Qalalyq bilim basqarmasynda Atyraý mektepterinde qandaı ustazdardyń jetispeıtinin aıtyldy, dep habarlaıdy QazAqparat tilshisi.
«Sońǵy jyldary Atyraý mektepterinde orystildi synyptarǵa suranys artty. Qoǵamdyq pikir saýalnamalary kórsetkendeı, bul túlekterdiń keleshekte Reseıdiń joǵary oqý oryndarynda bilim alýǵa nıet bildirýlerimen baılanysty bolyp shyqty. Bizdiń mamandar ata-analardy qazaq synyptaryn tańdap, qujattardy qazaq mektepterine tapsyrýǵa kóndirýge tyrysady. Degenmen orystildi mektepterge suranys artýda. Saldarynan orystildi synyptarda ustazdar jetispeı jatyr», - dedi qalalyq bilim basqarmasynyń jalpy bilim sektorynyń meńgerýshisi Amanbek Husynov Óńirlik kommýnıkatsııalar qyzmetinde ótken brıfıngte.
A. Husynovtyń aıtýynsha, búginde Atyraý mektepterinde orys tili men ádebıetinen sabaq júrgizetin 79 muǵalim, 6 psıholog, 16 tehnologııa ustazy, 90 bastaýysh mektep muǵalimi, fızıka páninen 11 muǵalim, matematıkadan - 29, tarıhtan - 9 muǵalim qajet. Sondaı-aq, qazaq jáne orys synyptarynda dene tárbıesinen sabaq beretin 19 ustaz, bastapqy áskerı daıyndyqtan 3 maman, 6 hımık jáne 4 bıolog, qazaq mektepterinde matematıkany oqytatyn 33 muǵalim jetispeıtin bolyp shyqty.
