Atyraý mektepteri jumys istemeıtin 41 adamǵa 90 mln teńge jalaqy aýdarǵan
Sybaılas jemqorlyqqa qarsy is-qımyl agenttiginiń Atyraý oblystyq departamenti preventsııa basqarmasynyń basshysy Jánibek Qarajanovtyń aıtýynsha, bilim salasynda jas urpaqty tárbıeleý men oqytýǵa eleýli tosqaýyl jasaıtyn júıeli sybaılas jemqorlyq táýekelderi bar.
«Bıyl bilim berý salasyndaǵy sybaılas jemqorlyq táýekelderine syrtqy taldaý júrgizildi. Taldaý nátıjesimen 10-ǵa jýyq sybaılas jemqorlyq táýekeli anyqtaldy. Osyǵan baılanysty 26 usynym engizildi. Atyraý oblysyndaǵy 12 mektepten memleket ıgiligi úshin is júzinde jumys istemeıtin 41 «óli janǵa» jalaqy aýdarylyp, shamamen 90 mln teńge shyǵyn keltirilgeni anyqtaldy. Memleketten qoldaý retinde bóletin bıýdjet qarajaty nysanaly maqsaty boıynsha paıdalanylýǵa tıis. Óıtkeni, sapaly bilim – tabysty bolashaqtyń kepili», -deıdi Jánibek Qarajanov.
Eske sala ketelik, budan buryn Atyraý oblysynda 81 muǵalim jalǵan dıplommen jumys istegenin habarlaǵan bolatynbyz.
Jalǵan dıplomy bar muǵalimder monıtorıng kezinde anyqtalǵan. Máselen, 51 qyzmetker mektepke deıingi bilim berý mekemelerinde, 30 muǵalim orta mektepterde jumys istegen.
«Mektepterde «óli jandar» bar. Qyzmetkerler men oqýshylar sany birdeı mektepter ártúrli qarjylandyrylǵan. Bir qyzmetker bir mezgilde 4-5 mekemede jumys istegen. Keıbir bilim berý mekemelerinde basshylar ózderine laýazymdyq jalaqysyna ústemeaqy aýdaryp otyrǵan», -dep habarlaǵan edi Jánibek Qarajanov.
