Atyraý mektebine jazýshy Ábish Kekilbaıulynyń esimi berildi

ATYRAÝ. QazAqparat – Atyraý qalasyndaǵy №41 orta mektepke memleket qaıratkeri, Qazaqstannyń Eńbek Eri Ábish Kekilbaıulynyń esimi berildi, dep habarlaıdy QazAqparat tilshisi.

Mektepte Ábish Kekilbaıulynyń esimi berilýine oraı arnaıy is-shara ótti.

Oǵan ustazdar men oqýshylar, qala ákimdigi, bilim berý, mádenıet basqarmasynyń qyzmetkerleri, til janashyrlary men ata-analar qatysty.

Atalǵan mektep munaıly shahardaǵy «Samal» shaǵynaýdanynda ornalasqan.

Qazir bilim ordasynda 800-den astam oqýshy bilim alady. Aldaǵy oqý jylynda mektepte «Ábishtaný oqýlary» baǵytymen qosymsha sabaq júrgizý kózdelgen.

«Ábish Kekilbaev – qazaqtyń rýhyn kótergen, maqtanyshy bolǵan jazýshy. Ári úlken saıası dodada keń júregimen, darhan minezimen sózdiń qadirin, qasıetin biletin sóz maıtalmany. Ony ulttyq rýhymyzdyń kóterilýine erekshe áser etken tarıhı tulǵamyz dep bilemiz. Óıtkeni, ol el táýelsizdiginiń nyǵaıýyna, memlekettiń qalyptasýyna, halyqty birlikke uıytýǵa saıası qaıratker kóp is atqardy. Osy mektepte oqıtyn oqýshylar Ábish atamyzdaı memleketine adal qyzmet etetin qoǵamnyń belsendi azamattary bolyp ósetinine senemin», -dedi Atyraý qalasy ákiminiń orynbasary Nurjan Ermuhanov.

Eske sala ketelik, budan buryn «Adaı» kúıin kúmbirletken astrahandyqtar Atyraý oblysyna chellendj joldaǵanyn habarlaǵan edik.

Keıin Dına orkestriniń ujymy astrahandyqtar chellendjin BQO-daǵy áriptesterine baǵyttady.

«Mereıtoı aıasynda uly kúıshi, kompozıtor babamyzdyń máńgilik meken tapqan orny – Reseı Federatsııasynyń Altynjar aýylynda ornalasqan Qurmanǵazy óńirlik mádenı ortalyǵynan Atyraý oblysyna chellendj joldanǵan edi. Dına Nurpeıisova atyndaǵy akademııalyq qazaq halyq aspaptary orkestri osy chellendjdi qabyldap, Batys Qazaqstan oblysynyń Dáýletkereı atyndaǵy qazaq halyq aspaptary orkestrine joldady», - deıdi orkestr dırektory Baqytbek Sartbaev.