«Atyraý-Mańǵystaý» poıyzynda tolǵaǵy qysqan áıeldi bosandyrǵan jolserik syıaqy alatyn boldy
ASTANA. 14 qańtar. QazAqparat - «Atyraý-Mańǵystaý» poıyzynda tolǵaǵy qysqan áıeldi aman-esen bosandyryp alǵan jolserik Aqómir Qulbaeva syıaqy alatyn boldy.
Bul týraly «Jolaýshylar tasymaly» AQ baspasóz qyzmetiniń basshysy Tımýr Asylhanov óziniń fasebook-taǵy paraqshasynda jazdy.
Budan buryn habarlaǵanymyzdaı, Beıneý aýylynyń turǵyny S.Orazalıeva Atyraý-Mańǵystaý baǵytyndaǵy poıyzda bosanǵan bolatyn. Perzenthana qyzmetkerleriniń aıtýynsha, dúnıe esigin jol ústinde ashqan qyz balanyń densaýlyǵy jaqsy, onyń salmaǵy 3 keli 550 gramm, boıy 51 santımetr. Bala men ana ózderin jaqsy sezinýde.
«Bul Jańa jylda jolda dúnıege kelgen alǵashqy náreste. 11 qańtar tańerteńgi 6:00 saǵatta Atyraý-Mańǵystaý poıyzynyń jolserigi Aqómir Qulbaeva jolaýshyny bosandyrýǵa kómektesti. Qyz bala týdy, ol 3 keli 550 gramm tartady, boıy 51 santımetr. Aqómir óziniń eńbek jolynda úsh ret bosanýǵa qatysqan. Oǵan syıaqy berý jóninde qoldaýhat jazamyz», - dep atap ótti T.Asylhanov.
