«Atyraý loto» oıyn zalynyń qyzmetin uıymdastyrǵan azamat 85 mln.teńgeden astam zańsyz tabys alǵan

Bul týraly búgin QR Ekonomıkalyq qylmysqa jáne sybaılas jemqorlyqqa qarsy kúres agenttiginiń resmı ókili (qarjy polıtsııasy) Murat Jumanbaı málim etti.

«Qarjy polıtsııasy organdarynyń jedel-tergeý tájirıbesi kórsetkendeı, zańsyz oıyn aınalymynyń negizgi bóligin oıyn avtomattarynyń astyrtyn zaldaryn uıymdastyrý faktileri quraıdy. Jyldyń basynan qarjy polıtsııasy organdarymen 129 osyndaı oıyn zalynyń qyzmeti áshkerelendi»,- dedi M. Jumanbaı.

Onyń sózine qaraǵanda, Atyraý oblysynda jeke kásipker Murzaǵalıev 2 jyl bas bostandyǵynan aıyryldy. «Atyraý loto» oıyn zalynyń qyzmetin uıymdastyrǵan ol 85 mln.teńgeden astam zańsyz tabys alǵan. Shyǵys-Qazaqstan oblysynda Lıgaı esimdi azamat 2 jylǵa shartty túrde jaýapqa tartyldy. Ol uıymdastyrǵan oıyn avtomattary zalynda 250 myń teńgeden astam aqsha jáne 16 oıyn avtomaty tárkilendi.

Aqtóbe oblysynda zańsyz oıyn bıznesimen aınalysyp, 3,9 mln.teńge zańsyz tabys alǵan jeke kásipker sotqa tapsyryldy. Astyrtyn zalyn tekserý kezinde 18 oıyn avtomaty tárkilendi.