Atyraý kósheleriniń birine Qabylanbaı batyrdyń esimi berildi
ATYRAÝ. QazAqparat - Atyraý qalasyndaǵy kóshelerdiń birine Isataı men Mahambet bastaǵan sharýalar kóterilisi batyrlarynyń biri - Qabylanbaı Qaldybaıulynyń esimi berildi, dep habarlaıdy QazAqparat tilshisi.
Bul oblystyq ákimdik men máslıhattyń birikken qaýlysy men sheshiminiń negizinde júzege asty.
Kósheni ashýǵa Atyraý qalalyq tilderdi damytý jáne mádenıet bóliminiń bastyǵy Aqylbek Rysqalıev jáne Qabylanbaı batyrdyń urpaqtary qatysty. Ashylý rásiminde Qabylanbaı batyrdyń qrpaǵy Joldasqalı Jıenbaev sóz sóılep, H.Dosmuhamedov atyndaǵy Atyraý memlekettik ýnıversıtetiniń professory Amangeldi Shamǵonov baıandama jasady.
Sharaǵa kelgender er esimin el esinde máńgilik qaldyrý jónindegi usynystyń respýblıkalyq onomastıkalyq komıssııa tarapynan oń qabyldanǵanyn jetkizdi. Al, H.Dosmuhamedov atyndaǵy Atyraý memlekettik ýnıversıtetiniń professory, tarıhshy-ólketanýshy Amangeldi Shamǵonovtyń aıtýynsha, 1836-37 jyldardaǵy kóteriliste Qabylanbaı batyr alym-salyq tóleýden bas tartyp qana qoımaı, qolyna qarý alyp, baılardyń múlkin kedeılerge úlestirgen. Podpolkovnık Geke bastaǵan jazalaýshylar ony Isataı men Mahambetten keıingi bedeldi úshinshi tulǵa dep eseptegen eken. Qoldaǵy derekterge súıensek, Terektidegi Balqy aýylynda bolǵan qaqtyǵysta jaýmen shaıqasqan batyr jasaǵy jeńiske jetip, sharýalardyń jeri men malyn qaıtaryp beripti.
Qabylanbaı batyr bala kezinde qabandy jalań qolmen ustap, úzeńgimen soǵyp óltiripti. Sodan beri kózge túse bastaǵan. Taǵy bir qyzyq jaıt, denesiniń tulǵaly bolǵany sonshalyq, «Qara buqa» men «Sary qasqa» degen attar ǵana minisine shydaǵan. Ol talaı ret jendetterdiń qolynan sytylyp shyqqan. Shaıqastardyń birinde qolǵa túsip, Sibirge aıdalǵan. Onyń erjúrek jan ekenin Gekeniń ózi Perovskııge jazǵan hatynda moıyndaǵan.
