Atyraý kóshelerinen 7 myń tekshe metr sý soryldy
ATYRAÝ. QazAqparat - Atyraý kóshelerinde sý sorý boıynsha 45 vakýým mashınasy úzdiksiz jumys jasaýda, dep habarlaıdy QazAqparat tilshisi.
Aıta keterligi, 18 sáýirge qaraǵan túni jańbyr jaýyp, artynsha qarǵa ulasqan. Qazirgi ýaqytta qaladaǵy kommýnaldyq qyzmet jańbyr men qardyń saldaryn joıýda. Atyraý oblysy ákiminiń orynbasary Nurlan Taýbaev pen Atyraý qalasynyń ákimi Álımuhammed Quttumuratuly jańbyr men qar saldaryn joıý jónindegi jedel shtabtyń jumysymen tanysty.
Qazirgi ýaqytta qala kóshelerin sorý men qardy jınaý úshin arnaıy 45 vakýým mashınasy jumys isteýde. Sonymen qatar 8 júk kóligi, 6 traktor, «Arnaýly avto baza» JShS-nyń 290 qyzmetkeri tartyldy. Eki kún boıy qala kóshelerinen 7 myń tekshe metr sý sorǵyzyldy.
«20 vakýýmdyq arnaıy tehnıkany usynǵan qalanyń jeke kásipkerleri úlken kómek kórsetti. Qazir sýdy jınaý úshin jeke kásipkerlerge tıesili taǵy 10 osyndaı tehnıka boıynsha kelissóz júrgizilýde. Búgingi tańda qalada 5-6 sý basqan shaǵyn aýdan bar, onda biz balabaqshalar men mektepterdiń, sondaı-aq jeke menshik úılerdiń mańaıyna basa nazar aýdardyq», - dedi Atyraý qalasy ákiminiń orynbasary, jańbyr men qardyń saldaryn joıý jónindegi jedel shtabtyń basshysy Shákir Keıkın.
Atyraý qalasyndaǵy birqatar aýdandarda elektr qýaty úzilip qaldy. Búgingi kúni apatty joıýmen aınalysatyn «Atyraý Jaryq» AQ-nyń 25 brıgadasy transformatorlyq stansalarda jumys isteýde.
«Apatty múmkindiginshe qysqa merzimde joıý qajet, al keshke deıin qala turǵyndary men aýyldyq okrýgterdiń turǵyndaryna jaryq berilýi kerek, turǵyndar uzaq ýaqyt boıy elektr qýatynsyz otyrmaýy tıis, sebebi túnde aýa temperatýrasy tómendeıdi dep kútilýde», - dedi Atyraý oblysy ákiminiń orynbasary Nurlan Taýbaev.
Aýa raıynyń qolaısyzdyǵyna jáne jylytý maýsymynyń aıaqtalýyna baılanysty, 18 sáýirde barlyq mektepterde sabaq toqtatyldy. Túnde jeke menshik úılerdiń turǵyndarynan sý sorylý kerektigi týraly kóptegen ótinish kelip tústi. Atyraý qalasynyń ákimi bilim berý mekemeleri men jeke menshik úı turǵyndarynyń jaǵdaıymen tanysty jáne qolastyndaǵylarǵa birqatar tapsyrmalar berdi.
«Áleýmettik nysandardyń, mektepterdiń jáne balabaqshalardyń aýmaǵy oqýshylarǵa kedergisiz mektepke barýdy tolyǵymen qamtamasyz etý qajet. Aldymen jeke menshik úılerdiń aldaryndaǵy sýdy sorý qajet, úılerin sý baspaýy úshin»,- dedi Álımuhammed Quttumuratuly komýnaldyq qyzmetkerlerge tapsyrma bere otyryp.
Aıta keteıik, Atyraý qalasynyń turǵyndary Telegram jelisindegi Atyraý oblysynyń ákimdigi paraqshasnyda sý basqan meken-jaılar jóninde habarlaı alady.
