Atyraý kóshelerinen 52 myń tekshe metr qar shyǵarylyp, 200 tekshe metr sý soryldy
Atyraý qalalyq ákimdiginiń baspasóz qyzmetinen málim etkendeı, munaıly shahardyń kóshelerinde jınalǵan qardy shyǵarý jalǵasyp jatyr.
«Qazir qala kóshelerin qardan tazartý úshin «Arnaýly avtobaza» JShS-niń qyzmetkerleri kúsheıtilgen jumys rejımine kóshirildi. Osyndaı jumystyń nátıjesinde 4-19 aqpan aralyǵynda 52 myń tekshe metr qar shyǵaryldy. Kólik joly men jaıaý júrginshiler jolaǵyna, basqa de jerlerge 516 tonna reagent sebildi. Bul jumystardy atqarýǵa kásiporynnan 300-ge jýyq jumysshy men 125 arnaıy tehnıka jumyldyryldy», -dep habarlady ákimdiktiń baspasóz qyzmeti.
Sondaı-aq, erigen qar sýyn sorý úshin «Arnaýly avtobaza» JShS tarapynan 8 vakýým kóligi bólingen. Arnaıy kólikpen kóshelerden 200 tekshe metr sý sorylǵan.
«Qardy tazalaý jumystary kezinde ortalyq kóshelerden bólek sý basý qaýpi joǵary jer úılerdiń aýmaǵy anyqtaldy. Qazir oǵan basa nazar aýdarylyp otyr», -dep málim etti qalalyq ákimdiktiń baspasóz qyzmetinen.
Eske sala ketelik, budan buryn Atyraýdy qalyń qar basyp, kólik qozǵalysy qıyndaǵanyn jazǵan bolatynbyz.
«Qazgıdromet» RMM Atyraý oblystyq fılıalynyń bólim basshysy Aına Qazǵulovanyń aıtýynsha, bıyl 2016 jyldan beri alǵash ret qalyń qar jaýǵan.
Qalyń qar jolaýshy tasymaldaıtyn avtobýstar men jeńil kólikterdiń qozǵalysyn qıyndatty. Atyraý qalasynyń shetkeri kósheleri men shahar mańyndaǵy eldimekenderde kólikter qalyń qarǵa batyp qaldy. Máselen, Damby aýylynyń turǵyndary Atyraý qalasyna jete almaǵan.