Atyraý kóshelerine joǵary qýatty transformatorlar qoıylady
ATYRAÝ. QazAqparat - Atyraýda bıyl tozyǵy jetken elektr qondyrǵylaryna qaıtadan jańartý jáne kúrdeli jóndeý jumystary júrgiziledi, dep habarlaıdy «QazAqparat» HAA tilshisi.
Jańartylýy qajet dep tanylǵan transformatorlarǵa jıyrma jyldan asa ýaqyt ótken.
«Atyraý-Jaryq» qalalyq elektr jelileriniń basshysy Qýat Sısenǵalıevtiń málimetine súıensek, bıyl Atyraýda tozyǵy jetken bes elektr transformator beketi buzylyp, jańadan salynbaq.
«Jańartylyp qaıta salý kezinde elektr qondyrǵylary tolyqtaı jańasyna aýystyrylady jáne transformatorlyq pýnkt ǵımaraty buzylyp, ornyna jańa ǵımarat salynady. Jańa elektr qondyrǵylary men joǵary qýatty transformatorlar ornatylady», - dedi Qýat Sısenǵalıev.
Jańartylatyn transformatorlar tiziminde Avangard-2 yqsham aýdanyndaǵy №7, №8, №9, №16 kópqatarly turǵyn úılerdi elektr energııasymen qamtamasyz etip turǵan 172-1 transformator beketi, Saryózek aýylyndaǵy oblystyq ókpe aýrýlary aýrýhanasy mańyndaǵy 148-1 transformatory, qazaq soqyrlar qoǵamy qoǵamdyq birlestiginiń Atyraý fılıaly ǵımaraty men Ǵumarov, Goslovskaıa, Vladımırov kóshelerin elektr energııasymen qamtyp turǵan 174-3 transformatory, Ýálıhanov, Zavodskaıa, Sverdlovskaıa kósheleriniń turǵyn úılerin qamtamasyz etip turǵan 27-11 transformatory jáne Bilálov, Nysanbaev, Moldaǵulova kóshelerindegi turǵyn úılerdi elektr energııasymen jabdyqtap turǵan 143-1 transformator beketi bar.
«Budan bólek, qalada 33 transformator beketine jyl sońyna deıin kúrdeli jóndeý júrgizemiz», - dedi «Atyraý-Jaryq» qalalyq elektr jelileriniń basshysy Qýat Sısenǵalıev.
