Atyraý kóshelerinde jatypisherler jaıly áleýmettik jarnamalar paıda boldy
ATYRAÝ. QazAqparat - Atyraý kóshelerinde búgingi qoǵamdaǵy kemshilikterdi ájýalaıtyn áleýmettik jarnamalar paıda bola bastady, dep habarlaıdy «QazAqparat» HAA tilshisi.
Ázirge sýretshi Ańsaǵan Mustafanyń jumystary beınelengen tórt bılbord ornalastyryldy. Olardyń birinde qart anasynyń zeınetaqysyna kúneltetin semiz adam beınelengen. Endi biri kereýette jatyp jumys kútip jatqan erinshekti mysqyldaıdy. Sýretshi búgingi qoǵamdaǵy áleýmettik jelilerge táýeldilikti de nazardan tys qaltyrmaǵan. Sýretterdiń avtory Ańsaǵan Mustafa - kásibı sýretshi. Onyń qolynan shyqqan jumystarynyń kórmesi Astana, Almaty jáne basqa da Qazaqstan qalalarynda ótkizildi.
«Búgingi qoǵamdaǵy adamdardyń kemshiligin ájýalaıtyn jumystar jasaý týraly usynysty qala ákiminiń orynbasary Meıirim Qalaýı aıtty. Men bul usynysty qýana qabyl aldym», -dedi «QazAqparat» HAA tilshisine A.Mustafa.
«Ańsaǵan bizge 50-ge jýyq jumysyn jiberdi. Áleýmettik jarnamalardyń kópshilik nazaryn aýdarta alǵanyn kórip otyrmyz. Bul sýretter jaıly áleýmettik jelilerde de kóp jazyla bastady. Sondyqtan mundaı sýretterdi aldaǵy ýaqytta da qala kóshelerine ilip qoıýdy jalǵastyra beremiz», - dedi M.Qalaýı.
