Atyraý kópiri graffıtıden tazartyldy, onda esirtki satatyn saıt ataýlary da bolǵan

ASTANA. QazAqparat – «Astana jastary» volonterleri kórikti jerdiń kórinisin buzatyn graffıtıdi tazalaý úshin elordadaǵy «Atyraý kópirinde» qalanyń bas qosty, dep habarlaıdy QazAqparat elorda ákimdiginiń resmı saıtyna silteme jasap.

«Osy aktsııaǵa qatysqandardyń barlyǵyna alǵysym sheksiz. «Atyraý kópiriniń» paıdalanýǵa berilgenine bes jyl boldy. Bul – elordanyń ǵana emes, búkil eldiń kórikti jerleriniń biri. Muny baǵalamaıtyndar qurylymnyń kórinisin ártúrli jazýlarmen, sýrettermen shımaılap tastaǵan. Olar munysymen ózderi jaıly «estelik qaldyrdyq» dep sanaıtyn shyǵar, biraq shyn máninde, keıingige izin qaldyrýshylar – óz qalasyna qamqorlyq jasaıtyn, onyń bet-beınesine beı-jaı qaramaıtyn jastar», - dedi Nura aýdany ákiminiń orynbasary Álııa Ábsemetova.

Ol vandaldardyń jazýlary qalalyq ortanyń sulýlyǵyn buzyp qana qoımaıtynyn, onda esirtki satatyn saıttardyń mekenjaılary da jazylǵanyn atap ótti.

«Bul – esirtki taratýdyń tanymal túrleriniń biri. Munda esirtki zattaryn saqtaıtyn saıttar men oryndar kórsetiledi. Sonymen qatar, osyndaı jarnamanyń kómegimen jastar zańsyz tabys tabýǵa tartylady», - dedi spıker.

Onyń aıtýynsha, qalanyń kommýnaldyq qyzmetteriniń kúsh-jigeri máseleni sheshý úshin jetkiliksiz. Ol úshin qala turǵyndary da osyndaı jazýlardyń paıda bolýynyń aldyn alyp, múmkindiginshe olardy óshirý arqyly óz qalalarynyń kórkeıýine úles qosa alady.

Aıta keteıik, Memleket basshysynyń tapsyrmasy boıynsha osy jyldyń 1 qańtarynan bastap vandalızm aktileri, qoǵamdyq jáne jeke múlikti búldirgeni úshin jaza qatańdatyldy.

Polıtsııa men elorda ákimdigi azamattardy qoǵamdyq tártipti saqtaýǵa jáne qala múlkine zııan keltirmeýge shaqyrady. Kez kelgen quqyq buzýshylyq anyqtalady, tıisinshe jaýapkershilik qarastyrylǵan.