Atyraý qalasynyń ákimi kommýnaldyq qyzmet jumysyn synǵa aldy
ATYRAÝ. QazAqparat - Atyraý qalasynyń ákimi Álımuhammed Quttymuratuly kommýnaldyq qyzmet jumysyn ótkir synǵa aldy, dep habarlaıdy QazAqparat tilshisi Atyraý qalalyq ákimdiginiń baspasóz qyzmetine silteme jasap.
«Kem degende aptasyna eki márte aýlaaralyq reıdter júrgizip, qala mańyn jaıaý júrip ótip, baqylaý jasaýǵa tıissizder. ıAǵnı, qalanyń problemasyn kózben kórýlerińiz kerek. Kabınetterde otyra bermeı, jaǵdaıdy ózderińiz tekserińizder. Jaıaý júrgilerińiz kelmese, qyzmettik kólikterińizdi tartyp alatyn bolamyz. Bul másele kommýnaldyq qyzmet salasynyń basshylaryna tikeleı baılanysty. Qalalyqtar bizden nátıje kútýde. Adamdar taza qalada qolaıly jaǵdaıda ómir súrýi kerek. Biz óz tarapymyzdan bar kúsh jigerimizdi jumsaýymyz qajet. Jaýapkershiligin sezinbegenderge qatysty naqty sharalar qolǵa alynatyn bolady», dedi qala basshysy ákimdikte ótken apparat májilisinde qalalyqtardyń qoqys toly konteınerlerge baılanysty shaǵymdaryn talqylaı otyryp.
Qala ákiminiń aıtýynsha, oblys ortalyǵynyń problemalary negizinen áleýmettik jelilerde jarııalanyp otyrady. Demek, kommýnaldyq qyzmet basshylary máseleni operatıvti túrde sheshýge atsalysýy kerek. Jıyn barysynda qala ákimi aýlaaralyq reıdterden bólek, «Atyraý oblysy ákimdigi» Telegram chat-kanalyna turǵyndardan túsip jatqan aryz-shaǵymdarǵa da kommýnaldyq qyzmetkerlerdiń operatıvti túrde jaýap berýi tıis ekendigin eske saldy.
