Atyraý qalasynda sport mektebi paıdalanýǵa berildi
ATYRAÝ. QazAqparat - Astana qalasynyń 20 jyldyǵy merekesine oraı Atyraý qalasyndaǵy Tasqala aýylynda balalar men jasóspirimderge arnalǵan sport mektebi paıdalanýǵa berildi, dep habarlaıdy QazAqparat tilshisi.
Sport mektebiniń ashylý saltanatyna Atyraý qalasy ákiminiń orynbasary Polymbet Hasanov qatysyp, aýyl turǵyndaryn merekemen quttyqtady.
«Elbasymyz júzege asyryp otyrǵan saıasaty arqasynda salaýatty ómir saltyn ustaný, ásirese balalar men jastardy sportqa baýlý, olardyń sportpen turaqty aınalysýyna kóp múmkindikter jasalýda. Búgingi okrýg turǵyndarynyń ıgiligine berilgen 320 oryndyq sport mektebiniń ashylýy - egemendigimizdiń aıǵaǵy», - dedi qala ákiminiń orynbasary Polymbek Maksımuly.
Merdiger mekeme «Aqtóbe Kazmehano-montaj» jaýapkershiligi shekteýli seriktestiginiń dırektory Erlan Boqaev sport mektebi ǵımaratynyń kiltin qalalyq dene shynyqtyrý jáne sport bóliminiń basshysy Rınat Ibragımovke tabystady.
Aıta ketý kerek, qoldanysqa berilgen sport mektebinde segiz sporttyq zal bar. Onda sporttyń kez kelgen túrimen aınalysýǵa múmkindikter jasalǵan. Arnaıy trenajerǵa arnalǵan sporttyq jabdyqtar da alynǵan. Mektep syrtynda tennıs, basketbol sekildi sport túrlerimen aınalysýǵa arnalǵan úlken alańdar boı kótergen.
