Atyraý qalasynda dene qyzýyn túsiretin dári-dármek tapshy
NUR-SULTAN. QazAqparat - Turǵyndardyń dári-dármekti asa qajet bolmasa da, satyp alyp jatqandyǵy qalada dúrbeleń týǵyzyp otyr, dep habarlaıdy QazAqparat oblystyq densaýlyq saqtaý basqarmasyna silteme jasap.
«Semeınoe» dárihanalar jelisiniń dırektory Rýslan Sársenovtiń aıtýynsha, turǵyndar belgili bir dárilerdi qabyldaý ınfektsııa juqtyrýdyń aldyn alady nemese aýrý saldaryn azaıtady degen jalǵan aqparatqa senip júr.
- Mundaı dúrbeleń shamamen bir apta buryn bastaldy. Buryn kúnine 50 dana paratsetamol satylsa, qazir sany 1000 danaǵa deıin jetedi. Kóp adamdar týystary men dostarynyń nemese WhatsApp jelisindegi jalǵan habarlamalardyń áserinen dári-dármekti aýyrǵanda emes, aldyn ala satyp alady. Búginde «qaýipti derttiń betin qaıtarý úshin paratsetamol kómektesedi» degen jalǵan aqparat taralyp ketti. Karantın kezinde zimbirdi kóptep satyp alǵandaı, ony da satyp ala bastady. Al adamda dıareıa nemese angına bolýy múmkin. Biz dári-dármek satyp alýǵa tyıym sala almaımyz, óıtkeni biraz adam aýyldy jerlerden kelip, satyp alyp jatady. Qazirgi ýaqytta dene qyzýyn túsiretin dárilerge burynǵydan da kóp mólsherde tapsyrys berýge tyrysyp jatyrmyz. Bir aptadan keıin dári-dármek tapshylyǵy máselesi sheshiledi dep oılaımyn, - deıdi «Semeınoe» dárihanalar jelisiniń dırektory Rýslan Sársenov.
Aıta keteıik, oblystaǵy aýrýhanalar men emhanalar qajetti dári-dármektermen tolyq qamtamasyz etilgen.
Atyraý oblystyq densaýlyq saqtaý basqarmasy emdik sharalarǵa dáriger nusqaý bermegen jaǵdaıda, ol dárilerdiń paıdasyz nemese densaýlyqqa qaýipti ekendigin eskertedi.
