Atyraý qalasynda 50 bala pnevmonııamen aýyryp jatyr

ATYRAÝ. QazAqparat – Atyraýda 50 bala pnevmonııamen aýyryp jatyr, dep habarlaıdy QazAqparat.

Atyraý qalasyndaǵy №2 oblystyq aýrýhanasynyń bólim meńgerýshisi Ásııa Sıdeshovanyń málimetinshe, jedel respıratorlyq vırýstyq ınfektsııa bólimshesinde 130 bala emdelip jatyr.

«Onyń ishinde 1 jasqa deıingi 85 bala bar. Osy jastaǵy 50 baladan pnevmonııa anyqtaldy. Fıltr bólimshesinde PTR-test qorytyndysy anyqtalmaǵan 60-tan astam naýqas jatyr. Keıbir ata-ana dárigerdiń kómegine der kezinde júginbeıdi. Sol sebepten, bir aılyq nárestelerin aýrý baıqalǵannan keıin bir apta ótkende ǵana aýrýhanaǵa ákeletinder bar. Olar sábılerine úıinde ózderi em-dom jasaǵan», - deıdi Ásııa Sıdeshova.

Eske sala ketelik, budan buryn Atyraýda balalar arasynda jedel respıratorly vırýstyq ınfektsııa órship turǵanyn habarlaǵan edik.