Atyraý qalasy men Qurmanǵazy aýdany aralyǵynda poıyz qatynaýy múmkin
NUR-SULTAN. QazAqparat – Atyraý qalasy men Qurmanǵazy aýdany arasynda poıyz qatynaıtyn bolady. Bul týraly Ortalyq kommýnıkatsııalar qyzmetindegi brıfıng barysynda Atyraý oblysynyń ákimi Mahambet Dosmuhambetov aıtty, dep habarlaıdy QazAqparat tilshisi.
«Jol Qurmanǵazy aýdany turǵyndary úshin úlken másele. Óıtkeni, oblys ortalyǵynan 250 shaqyrym shalǵaıda ornalasqan. Atyraý-Astrahan joly áli jóndelip jatyr. Jolmen ózimiz de júremiz. Óte qaýipti. Poıyz shyǵarý máselesin «Jolaýshylar tasymaly» kompanııasymen birlesip qaradyq. Bir poıyz shyǵaryp, tekserip kórdi. Kestesin, toqtaıtyn jerlerin, qansha adam júretindigin baıqady. Qazir platskart jáne 2 jalpy vagony bary bir poıyzdy kúndelikti qatynaýǵa shyǵarý josparda bar», - dedi Mahambet Dosmuhambetov.
Oblys ákimi Atyraý-Qurmanǵazy poıyzyn iske qosýǵa qatysty tıisti qaýlyǵa da qol qoıǵanyn aıtty.
«Endi osy aıdyń 25-inde máslıhattyń sessııasy ótedi. Sessııaǵa osy máseleni shyǵaramyz. Depýtattar qoldaý bildiredi dep úmittenemiz. Qoldaý bolsa ary qaraı tıisti jumystardy júrgizip, poıyzdy jaqyn arada jolǵa shyǵarý josparymyzda tur», - dedi ol.
