Atyraý qalalyq qorǵanys isi basqarmasy bastyǵynyń orynbasary ustaldy
ASTANA. QazAqparat - Atyraý qalalyq qorǵanys isi basqarmasy bastyǵynyń orynbasary M.Orynbekov para aldy degen kúdikpen ustaldy. Bul týraly Sybaılas jemqorlyqqa qarsy is-qımyl ulttyq bıýrosynyń baspasóz qyzmetinen habarlady.
«Sybaılas jemqorlyqqa qarsy is-qımyl ulttyq bıýrosynyń Atyraý oblystyq departamenti Atyraý qalalyq qorǵanys isi basqarmasy bastyǵynyń orynbasary, kapıtan M.Orynbekov pen mobılızatsııalyq josparlaý bóliminiń bastyǵy, kapıtan D.Ospanovty ustady. Laýazymdy tulǵalardyń jeke tulǵadan esepke der ýaqytynda turmaǵany úshin ákimshilik jaýapkershilikke tartpaý jáne áskerge shaqyrý jasynyń ótýine baılanysty áskerı bılet berý úshin 70 myń teńge para alǵany anyqtaldy. Qazirgi ýaqytta M.Orynbekov QR QІJK 128-shi babyna sáıkes Atyraý qalalyq ІІB oqshaýlaǵyshyna qamaldy. Sot aldynda tergeý amaldary júrgizilýde», - delingen habarlamada.
