Atyraý-Inder baǵytyndaǵy bir shaqyrym joldy jóndeýge 487 mln teńge jumsalǵan - tekserý júrgizilmek
Bul týraly qoǵam belsendilerimen sybaılas jemqorlyq táýekelderi kartasyn iske asyrý aıasyndaǵy problemalyq máselelerdi talqylaý kezinde aıtyldy. Kezdesýde avtomobıl joldaryn salý, qaıta jańartý, nysandardy paıdalanýǵa qabyldaý kezinde sybaılas jemqorlyqqa yqpal etetin máseleler kóterildi.
«Ádildik joly» respýblıkalyq qoǵamdyq birlestiginiń Atyraý fılıalynyń sarapshysy Arman Ábsemetovtiń aıtýynsha, avtomobıl joldarynyń sapasyna qoǵamdyq monıtorıng júrgizile bastaǵan.
«Inder aýdanynyń turǵyndarymen joldardy salý jáne qaıta jańartý salasyndaǵy aýdannyń problemalyq máselelerin talqylaý maqsatynda kezdesý ótkizdik. Bul aýdannyń belsendi azamattary, máslıhat depýtattary júk tasymaldaýshylardyń shamadan tys júktemesine baılanysty jol sapasy nasharlaǵanyna renishin bildirdi. Osy oraıda mynadaı suraq týyndaı: 5-6 adamnyń qaltasy mańyzdy ma, álde aýdandaǵy 30 myńnan astam turǵynnyń múddesi mańyzdy ma? Árıne, tasymaldaýshyǵa zańnamada belgilengen talaptar aıasynda júk tasymaldaý tıimsiz. Eger tasymaldaýshynyń jolyna ketetin shyǵyn men az tabysty eskeretin bolsaq, onda bul sandar matematıkalyq, logıkalyq nemese moraldyq turǵydan salystyrýǵa kelmeıdi» -deıdi Arman Ábsemetov.
Onyń málimetine súıensek, Atyraý-Inder baǵytyndaǵy joldyń 10 shaqyrymyna qaıta jańǵyrtýǵa bıýdjetten 4 mlrd 876 mln 438 myń teńge bólingen. Demek, 1 shaqyrym joldy jańǵyrtýǵa 487 mln teńge jumsalady.
Sybaılas jemqorlyqqa qarsy is-qımyl agenttiginiń oblystyq departamenti preventsııa basqarmasy basshysynyń mindetin atqarýshy Ǵıbat Kýkatovtyń aıtýynsha, respýblıkalyq, oblystyq mańyzy bar, onyń ishinde Atyraýdan Reseı Federatsııasynyń shekarasyna deıin qatynaıtyn jol qurylysyna keshendi tekserý júrgizýdi josparlanyp otyr. Tekserý oblystyq prokýratýranyń ókilderimen birge júrgiziledi.
«Bizdiń oıymyzsha, jol qurylysynda sybaılas jemqorlyqtyń alǵysharttary bar. Soǵan baılanysty bıýdjettik qarajatty urlaý faktileriniń aldyn alý boıynsha jumys júrgiziledi», -deıdi Ǵıbat Kýkatov.
Eske sala ketelik, budan buryn Atyraýda jolaýshy tasymaldaý shyǵynyn sýbsıdııalaý usynylǵanyn https://kaz.inform.kz/news/atyrauda-zholaushy-tasymaldau-shygynyn-subsidiyalau-usynyldy_a3972335 habarlaǵan bolatynbyz.
Avtor: Bek Mustafa
