Atyraý fýtbol komandasy Danııa klýbymen yntymaqtastyq memorandýmyna qol qoıdy
Jergilikti komandanyń baspasóz qyzmetinen málim etkendeı, maqsat – balalar men jasóspirimder fýtbolyn damytý úshin tájirıbe almasý jáne jańa ádistemeler engizý.
«Bul – bizdiń klýb úshin tarıhı qadam ári mańyzdy oqıǵa. Óıtkeni, bul jas fýtbolshylarmen jumysty damytý men jaqsartýdyń jańa perspektıvasyn ashady. Ózara qurmet pen alǵa umtylýǵa negizdelgen bul memorandým jas talanttardy damytý salasynda qundy bilim men ozyq tájirıbelermen almasýǵa múmkindik beredi. Eki klýb ta jas sportshylardy oqytý daǵdylary men tásilderin jetildirýge kómektesetin birlesken is-sharalardy, semınarlar men jattyǵýlardy uıymdastyrady», - delingen «Atyraý» fýtbol klýbynyń áleýmettik jelide taratqan aqparatynda.
Munaıly óńirdiń fýtbol komandasy yntymaqtastyqtyń nátıjesinde birneshe maqsatqa qol jetkizýdi kózdep otyr.
Birinshiden, balalar arasynda daryndy fýtbolshylardy anyqtaý, olarǵa fýtbolshy ári tulǵa retinde damýǵa biregeı múmkindik berý. Ekinshiden, jattyqtyrýshylar quramynyń kásibıligin, biliktiligi men quzyrettiligin arttyrýǵa yqpal etip, tájirıbe men bilim almasý múmkindigin qamtamasyz etý. Úshinshiden, oqý protsesterin jaqsartýǵa jáne ońtaıly nátıjelerge qol jetkizýge baǵyttalǵan jańa ádistemeler men tehnologııalardy engizý. Tórtinshiden, oıynshylar, jattyqtyrýshylar men ata-analar arasyndaǵy dostyq qarym-qatynas pen ózara túsinistikti qalyptastyryp, qoldaý kórsetetin orta qurý.
Eske sala ketelik, budan buryn «Atyraý» fýtbol komandasyna jankúıerlerdiń orynsyz áreketi úshin aıyppul salynǵanyn habarlanǵan edi.
