Atyraý emhanalarynda PTR-test ótkizýge bıýdjet qarjysy negizsiz jumsalǵan

ATYRAÝ. QazAqparat – Atyraý emhanalarynda PTR-test ótkizýge bıýdjet qarjysy negizsiz jumsalǵan, dep habarlaıdy QazAqparat.

Atyraý qalalyq prokýrorynyń orynbasary Nurjan Ábilovtiń aıtýynsha, bıýdjet qarjysyn zańsyz jumsaý deregi anyqtalǵan.

«Prokýrorlyq tekserý kezinde Atyraý qalasyndaǵy №4 emhanada tegin PTR tekserýden ótýge jatpaıtyn 20 adamǵa tıisti joldamalar negizsiz berilip kelgeni anyqtaldy. Osylaısha 162 myń teńge bıýdjet qarajaty maqsatsyz jumsalǵan. Osyǵan uqsas zań buzýshylyq №3, №5, №7 jáne Geolog emhanalarynda da anyqtaldy. Prokýrorlyq qadaǵalaý sharalarymen zańsyz jumsalǵan 1,5 mln teńgeden astam qarjy bıýdjetke qaıtaryldy. Kináli tulǵalar jaýapkershilikke tartyldy», - dep habarlady Nurjan Ábilov.

Eske sala ketelik, buǵan deıin Atyraý perzenthanalarynda qyzmetter baǵasy negizsiz ósirilgenin habarlaǵan bolatynbyz.