Atyraý ekologteri tabıǵatty búldirýshilerge 7 mlrd teńgeden astam aıyppul saldy
Atyraý oblystyq ekologııa departamenti basshysynyń orynbasary – bas memlkettik ekologııalyq ınspektor Syrym Tilegenovtiń málimetinshe, bıylǵy 6 aıda jospardan tys 19 tekserý júrgizilgen.
«Atyraý oblysynda aýa basseıinin munaı-gaz óndirý jáne munaı óńdeý qyzmetimen aınalysatyn kásiporyndar lastaıdy. Soǵan baılanysty júrgizilgen tekserýler nátıjesimen Ekologııalyq zańnama talaptaryn buzýdyń 25 deregi anyqtaldy. Tabıǵatty búldirýshilerge 14 buzýshylyqty joıý týraly nusqama berildi. Onyń ishinde 12 nusqama tolyqtaı oryndaldy. Qalǵan nusqamalar oryndaý satysynda tur», -dep habarlady Syrym Tilegenov.
Onyń deregine súıensek, anyqtalǵan zańbuzýshylyqtar qatysty 68 ákimshilik is qozǵalǵan. Bes 5 ákimshilik is boıynsha toqtatý jóninde qaýly shyǵaryldy.
«Sot organdarynyń qaraýyna 23 ákimshilik is joldandy. Osy kezge deıin 9 is qaralyp, 7 mlrd 237 mln 547 myń 814 teńge kóleminde aıyppul salyndy», -dep málim etti Syrym Tilegenov.
Al, 40 ákimshilik is boıynsha 34 mln 836 myń 925 teńge ákimshilik aıyppul salý týraly qaýly shyǵarylyp, tolyqtaı óndirilgen.
Eske sala ketelik, budan buryn Atyraýda ruqsatsyz aýaǵa gaz jaqqan sheteldik kompanııa 21 mln teńge aıyppul tólegenin jazǵan bolatynbyz.
Oblystyq ekologııa departamentiniń baspasóz qyzmetinen málim etkendeı, «China National Chemical Engineering Co. LTD» kompanııasynyń Atyraý oblysyndaǵy fılıaly 2022 jyly gazdy jaǵýdy qorshaǵan ortaǵa emıssııalardy ekologııalyq ruqsatsyz júzege asyrǵany anyqtaldy.
Osyǵan baılanysty CNCEC-ke qatysty QR Ákimshilik quqyq buzýshylyq týraly kodeksiniń 328-babynyń 1-bóligimen ákimshilik jaza qoldaný týraly qaýly shyǵarylǵan. Qaýlyǵa sáıkes kompanııaǵa 21 mln 267 myń 327 teńge mólsherinde ákimshilik aıyppul salynyp, óndirildi.
