Atyraý ekologtary Reseımen shekaradaǵy Qıǵash ózeni sýynyń sapasyn tekserdi
Atyraý oblysynyń bas memlekettik ekologııalyq ınspektory Syrym Tilegenovtiń aıtýynsha, transshekaralyq Qıǵash sý aıdyny Reseı aýmaǵyndaǵy Edil ózeniniń bir tarmaǵy sanalady.
Al, jaqynda Volgograd oblysyndaǵy Edil ózenine kárizdik aǵyn sý jiberilgen. Sol sebepten, Qıǵash ózenindegi sý sapasyn tekserýge sheshim qabyldanǵan.
«Reseımen shekaradaǵy Qıǵash ózeninen sý synamalary 10 komponentke baılanysty alyndy. Onyń ishinde azot, sýlfat, nıtrattar, munaı ónimderi, hlorıd jáne basqa da quramdas bólikter boıynsha irikteldi. Tekserý nátıjesinde Atyraý oblysynyń Qurmanǵazy aýdanyndaǵy Qıǵash ózeniniń sýynda normatıvterdiń belgilengen shamadan asyp ketý deregi tirkelgen joq», -dedi Atyraý oblysynyń bas memlekettik ekologııalyq ınspektory Syrym Tilegenov.
Onyń aıtýyna qaraǵanda, Qıǵash ózenindegi sýdyń sapasyn baqylaý jalǵasa beredi.
Qıǵash ózeninen Atyraý men Mańǵystaý oblysynyń eldi mekenderin aýyz sýmen qamtý úshin uzyndyǵy 1 myń shaqyrymnan asatyn qubyr tartylǵan.
Eki oblysqa aýyz sý jetkizetin qubyrdyń jelileri, sorý, súzý qondyrǵylary eskirgen. Qubyr 80 paıyzǵa tozǵan.
Al, Qurmanǵazy aýdanynyń Qıǵash aýylyndaǵy stansa 1987 jyly salynǵan.
Nysannyń qýaty táýligine 260 myń tekshe metr sý aıdaýǵa eseptelgen. Biraq, qazir táýliktik qýaty – 110 myń tekshe metr.
Eske sala ketelik, budan buryn Jaıyq ózeniniń sýynan alynǵan synamadan fenol tabylǵanyn jazǵan edik.
