Atyraý ekologtary dalaǵa aǵyp jatqan sý men topyraqtan synama aldy
Atyraý oblysy boıynsha ekologııa departamenti áleýmettik jelide júktelgen vıdeoǵa baılanysty tekserý júrgizdi.
«Departament mamandary «Karabatan Utility Solutions» JShS-niń arnaıy ekonomıkalyq aımaqta ornalasqan aýmaǵynan plastıkalyq qara qubyrdan aqqanyn anyqtady. Kásiporynnyń sý daıyndaý jáne aǵyndy sýlardy tazartý alańynyń aýmaǵy qańyltyrmen qorshalǵan. Alaıda, arnaıy ekonomıkalyq aımaqtyń aýmaǵyna shamamen 200 metr jerge deıin jalǵaǵan plastıkalyq qara qubyrdan belgisiz sý jer betine tógilip jatyr. Arnaıy ekonomıkalyq aımaqta ornalasqan aýmaqtan jerdiń astymen kómilgen qubyr arqyly shamamen 3 shaqyrymdaǵy eki qudyqtan belgisiz sý jer betine tógilgen. Dalaǵa tógilip jatqan sýdan jáne topyraqtan synamalar alyndy», -dep habarlady departamenttiń baspasóz qyzmeti.
Qazir sý men topyraqtan alynǵan synamalarǵa taldaý júrgizý bastalǵan.
Eske sala ketelik, budan buryn Atyraý oblysynda dalaǵa taǵy da las sý tógilip jatqanyn habarlaǵan bolatynbyz.
Bul týraly «AQIQAT» qoǵamdyq birlestiginiń tóraǵasy Ǵazız Ǵabdýllın dabyl qaqty.
Onyń aıtýynsha, las sýdyń tógilgen jeri Maqat aýdanynda.
«KPI kompanııasy men oǵan merdigerlik qyzmet kórsetýshi kompanııalar budan buryn da, qazir de zaýyttyń artyna ekologııamyzǵa zııandy qaldyqtardy tógip júr. Bul áreketteri úshin buryn jaýapkershilikke tartyldy. Qazirgi ýaqytta ekologııamyzǵa qaıtalama zalalyn keltirýde. Qanshama gektar jaıylym jerdi búldirip jatyr», -deıdi Ǵazız Ǵabdýllın.
