Atyraý dárigerleri jaǵdaıy nasharlaǵan júkti áıelge sátti ota jasady

ATYRAÝ. QazAqparat – Atyraý dárigerleri jaǵdaıy nasharlaǵan júkti áıelge ota jasady, dep habarlaıdy QazAqparat óńirlik kommýnıkatsııalar qyzmetine silteme jasap.

Perınataldyq ortalyq dırektorynyń mindetin atqarýshy Q.Ermaǵambetovtiń málimetinshe, osy kezge deıin áleýmettik medıtsınalyq saqtandyrý arqyly 224 ota jasalǵan. Onyń ishinde 124 josparly, 100 shuǵyl ota bar.

«Shuǵyl otanyń biri júktiliktiń 32-aptasyn ótkerip áıelge jasaldy. Ol ortalyqqa 25 qańtarda júktiliktiń 32-aptasynda tústi. Jaǵdaıy aýyr boldy. Oǵan «Aýyr dárejeli preeklampsııa. Idıopatııalyq trombotsıtopenııalyq pýrpýra. Anemııanyń aýyr dárejesi»

dıagnozy qoıyldy. Sol sebepten, jansaqtaý bólimshesine qabyldandy. Júkti áıeldiń jaǵdaıyna baılanysty №1 oblystyq aýrýhananyń mamandarymen konsılıým ótti. Keıin ony elordadaǵy «Ana men bala ǵylymı ortalyǵyna»​ jetkizý týraly sheshim qabyldandy.​ Alaıda, odan koronavırýs ınfektsııasynyń belgisi anyqtalyp, oblystyq

perınataldyq ortalyǵynda shuǵyl ota jasaldy», - deıdi Q.Ermaǵambetov. ​

Onyń aıtýynsha, ómirge salmaǵy 1 keli 940 gramm, boıy 45 sm qyz kelgen. Nárestege bastapqyda jansaqtaý bóliminde em-dom kórsetilgen.

«Sábıden koronavırýs ınfektsııasynyń belgisi anyqtaldy. Jaǵdaıy turaqtanǵannan keıin №2 oblystyq aýrýhanada em qabyldady. Sodan soń 11 aqpanda úıine shyǵaryldy.

Osylaısha, oblystyq perzenthananyń mamandary kúrdeli otany sátti jasap, ana men balanyń ómirin saqtap qaldy», -deıdi Q.Ermaǵambetov.

Eske sala ketelik, budan buryn Atyraýda 52 jastaǵy áıel tuńǵysh sábıin bosanǵanyn

habarlaǵan bolatynbyz.