Atyraý dárigerleri shalǵaı aýyl turǵyndaryn medıtsınalyq tekserýden ótkizdi
Oblystyq densaýlyq saqtaý basqarmasynyń basshysy Qaısar Abdalıev bastaǵan dárigerler toby Qurmanǵazy aýdanynyń shalǵaıdaǵy eldi mekenderinde turatyn turǵyndarǵa medıtsınalyq kómek kórsetýdi qolǵa aldy.
«Aýdanǵa issaparymdy akýsher-gınekolog, lor, dermatolog, nevropatolog, gastroenterolog, allergolog, pedıatr sekildi beıindi dárigerler tobymen birge Úshtaǵan aýylynan bastadym. Buol aýylda 800-den asa turǵyn bar. Dárigerlik konsýltatsııalyq kómekke 30-ǵa jýyq turǵyn júgindi. Beıindi mamandar tıisti em-domdaryn júrgizip, keı naýqastarǵa qajetti analız jáne ózge anyqtamalaryn tapsyrýdy usyndy», -dep habarlady Qaısar Abdalıev.
Onyń aıtýynsha, budan soń dárigerler tobynyń jumysy Asan aýylynda jalǵasqan.
Munda 500-ge jýyq turǵyn mekendeıdi.
«Asan aýylynyń turǵyndary beıindi mamandarǵa jolyǵyp, densaýlyǵyn teksertti. Qosymsha týyndaǵan saýaldaryna jaýap aldy. Medıtsınalyq kómekke 40-tan asa adam júgindi. Aýyl turǵyndary endokrınolog, kóz dárigerleri de aýylǵa kelip, medıtsınalyq kómek kórsetýdi surady. Turǵyndar ótinishine sáıkes aldaǵy ýaqytta atalǵan beıindi mamandar kómek kórsetetin bolady», -dep málim etti Qaısar Abdalıev.
Súıindik aýylyndaǵy medıtsınalyq pýnktine beıindi mamandardan dárigerlik keńes alýǵa 13 mamyrda 50-ge, 14 mamyrda saǵat 10:00-ge deıin 30-ǵa jýyq turǵyn júgingen.
«Batyrbek, Eginqudyq jáne Jalǵyzapan aýylyndaryna arnaıy baryp, turǵyndardyń medıtsınalyq kómekke qoljetimdiligimen tanystym. Al, Eginqudyq aýylynda eski mektep janyndaǵy jer telimine jyl sońyna deıin medıtsınalyq pýnktiń qurylysyn júrgizý josparlanyp otyr. Jalǵyzapan aýylynda turǵyndardyń tıisti em-dom sharalaryn alýy úshin mektep janynan medıtsınalyq pýnkt ashylǵan. Aldaǵy ýaqytta bul aýylda da medıtsınalyq pýnkt salý josparǵa engizildi», -deıdi Qaısar Abdalıev.
Eske sala ketelik, buǵan deıin Atyraýda basqarma basshysy jedel járdem brıgadasymen shaqyrtýlarǵa barǵanyn jazǵan edik.
