Atyraý dárigerleri koronavırýstan qaıtys bolǵan áriptesin eske aldy
ATYRAÝ. QazAqparat – Atyraýda №2 oblystyq ınfektsııalyq aýrýhananyń dárigerleri koronavırýstan qaıtys bolǵan áriptesi Jumabek Dáýletovti eske aldy, dep habarlaıdy QazAqparat.
Qaýipti indetke shaldyqqan naýqastardy emdegen ınfektsıonıst-dárigerdiń biri – Jumabek Dáýletov Aqtóbe medıtsınalyq ınstıtýtyn bitirgen. Ol eńbek jolyn 1981 jyly Balyqshy aýdandyq aýrýhanasynda bastaǵan. Keıin 1998 jyly oblystyq ınfektsııalyq aýrýhanaǵa jumysqa aýysqan.
«Jumabek Baǵytuly bul aýrýhanada alǵashqyda - reanımotolog, odan soń ómiriniń sońyna deıin ınfektsıonıst bolyp eńbek etti. Aımaqqa esimi keńinen taralǵan dáriger ýaqytpen sanaspaıtyn. Óz isine úlken jaýapkershilikpen qaraýshy edi», - deıdi №2 oblystyq ınfektsııalyq aýrýhana dırektorynyń keńesshisi Aslan Jeńisuly.
Birge eńbek etken áriptesteriniń aıtýyna qaraǵanda, Jumabek Dáýletov 40 jylǵa jýyq dárigerlik eńbek jolynda oba, holera, túıneme sekildi vırýsty indetpen aýyrǵan jandarǵa emimen de, jyly sózimen de shıpa darytqan. Aýrýhanada jetispeıtin dárigerlerdiń de mindetin atqaryp júrgen. Tipti, talaı ret qan qysymy kóterilip otyrsa da, jumys ornyn tastap ketpegen.
«Ol – dárigerlik antyna adal, aq halatyna qylaýdaı daq túsirmegen taza jan. Jas býynǵa jón silter aqylshy boldy. Meıirbıkeler men tazalyqshylarǵa aǵasyndaı qamqor kózqaraspen qaraıtyn janashyr edi» -dep eske alady áriptesteri.
Eske sala ketelik, budan buryn Atyraýda karantın kúsheıtilgen edi.
