Atyraý dárigerleri qant dıabetinen saqtanýdyń joldaryn aıtty
ATYRAÝ. QazAqparat - Atyraý oblysy boıynsha qant dıabetine shaldyqqandar sany 9 myńnan asady, dep habarlaıdy QazAqparat tilshisi.
Onyń ishinde atalǵan derttiń birinshi tıpimen aýyratyndar sany - 549, al ekinshi tıpimen 8940 adam kúresýde. «Birinshi tıpti qant dıabetin aldyn alý mynalardy qamtıdy: durys tamaqtaný, bakterııalyq jáne juqpaly aýrýlardy ýaqtyly emdeý, ımmýnıtetti nyǵaıtý, jetkilikti qozǵalý belsendiligi, eger ata-anasynyń bireýinde qant dıabeti anyqtalsa, balaǵa aýrýdyń erte kezeńderinde dıagnostıkalaýdy júrgizý mańyzdy, deıdi Atyraý oblystyq aýrýhanasynyń shtattan tys endokrınology, joǵary sanatty dáriger Anna Chıchıbabına.
«Al ekinshi tıpti qant dıabeti aýrýyna shaldyqpaý úshin qant jáne qanty bar ónimderin shekteý qajet. Sondaı-aq sportpen shuǵyldaný, salmaǵyn baqylaý; temeki jáne spırtti ishimdikterden bas tartý kerek. Sondyqtan ár adam salaýatty ómir saltyn saqtap, dárigerge tekserilip, qandaǵy qanttyń mólsheri únemi tekserip otyrýy tıis».