Atyraý dalasynda qulpynaı ósirile bastady

ATYRAÝ. QazAqparat – Atyraýlyq sharýa dalaly alqapqa qulpynaı ósirýdi qolǵa aldy. Ol 1 gektarǵa 17 myń túp ıtalııalyq, kalıfornııalyq qulpynaı túrin ekken, dep habarlaıdy QazAqparat tilshisi.

Óńirlik kommýnıkatsııalar qyzmetiniń aqparatyna qaraǵanda, qulpynaı ósirýmen aınalysatyn Nurjigit Raqymjanov Mahambet aýdanynyń Jalǵansaı aýyldyq okrýginde turady. Ol 1 gektarǵa sýyqqa da, ystyqqa da tózimdi 17 myń túp sheteldik sorttaǵy qulpynaı ekken.

«Mamandyǵym – munaıshy. Buryn jeke kásippen de, sharýashylyqpen de aınalyspaǵan edim. Koronavırýs ınfektsııasy bastalǵanda, turǵyndar qoıdyń quıryq maıǵa, lımon men zimbirge, oǵan qosa qulpynaı syndy jemis-jıdekten qaınatylǵan tosaptarǵa suranys arta tústi. Sol kezde Qyrǵyzstannan bir qoraby 2 500 teńge turatyn qulpynaı keledi degendi estidim. Bazardan alǵan sol qulpynaıdyń dámi de, túri de kóńilimnen shyqqan joq. Sebebi, birneshe kún kólikpen tasymaldanǵan jumsaq jemis ezilip qalǵan», - deıdi Nurjigit Raqymjanov.

Sol kezde qulpynaı ósirýge bel býǵan. Biraq, aldymen qulpynaıdy ósirý ádisin zerttegen. Gollandııanyń, Italııanyń mamandarymen sóılesip, tuqym túrlerin salystyrǵan. Sóıtip, byltyr úıiniń aýlasyna 2 myń túp qulpynaı ekken.

«Qazir ıtalııalyq «Kleır» jáne kalıfornııalyq «Albıon» dep atalatyn qulpynaıdy ósirip otyrmyn. Bul qulpynaılar ári kólemdi, ári dámdi, bizdiń óńirdiń aýa raıyna tózimdiligimen erekshelenedi. «Kleır» jemisti kóktemde beredi. Al «Albıonnan» erte kóktemnen qarashaǵa deıin ónim alýǵa bolady», - deıdi sharýa.

Onyń aıtýynsha, qulpynaı ósirý úshin tuqymy men surpy sapaly bolýy kerek. Sýarý, tyńaıtqyshpen óńdeý, túrli aýrýlardan qorǵaý tehnologııasyn meńgerý qajet.

Eske sala ketelik, buǵan deıin atyraýlyq sharýa júgeriniń «pıoner» sortynan mal azyǵyn daıyndaıtynyn habarlaǵan bolatynbyz.